Hemwelatijan ke Amed de beşdarê rayîrşîyayîşê 9ê teşrîna verêne bîbî, derheqê Prosesê Aştî û Komelê Demokratîkî de qisey kerd. Înan dîyar kerd ke ganî azadîya fîzîkîye ya Rayber Abdullah Ocalanî bêro ca û berê hepisxaneyan abê ke komel de bawerîyêk virazîyo.
Prosesê Aştî û Komelê Demokratîkî nêzdîyê di serran o dewam keno. Proses 27ê sibate de bi vengdayîşê Rayber Abdullah Ocalanî dest pêkerd û zêdeyêr bi cehdê Rayber Ocalanî û Têgêrayîşê Azadîye ramîyeno. Heto bîn ra dewlete hema gamêka şênbere nêeşta; no zî komel de beno sebebê endîşeyan û bêbawerîye virazeno. Hemwelatijanê Amedî ke beşdarê rayîrşîyayîşî bîbî, Ajansê Welatî rê qisey kerd.
Hemwelatijan dîyar kerd ke bawerîya înan bi Têgêrayîşê Azadîye û Rayber Abdullah Ocalanî est a. La semedê ke dewlete gaman nêerzena, înan de bêbawerîyêk vejîyena meydan.
Hemwelatijan îfade kerd ke prosesê verên zî semedê ke dewlete û îqtîdarî gamî nêeştî, şikîyayî. Goreyê înan, no çî komelî de xirabîyêka girde viraşta.
Hemwelatijan bale ante awankerdişê yewîya şarê kurdan ser o. Goreyê înan eke şarê kurdi bibo yew, no proses do bi serkewtiş temam bibo; ganî warê sîyasetê kurdan zî şarî reyde eleqedar bibo.
Hemwelatijan îfade kerd ke seba ke komel de bawerîyêk virazîyaya ganî azadîya fîzîkîye ya Rayber Abdullah Ocalanî qetî bêro ca û berê hepisxaneyan abê.
