Dayîka Esma, yanî Esma Murad, Girkê Legê ra ya. Aye 1991 de Rayber Apo dîbi. Komployî ra nat nêzdîyê 28 serran o ke çalakîyan de ya û kincanê sîyayan xo ra dana. Esma Murade vat ke cuyêka bê Rayber Apoyî aye rê heram a.
Esma Murad 66 serrî ya û sey Dayîka Esma yena naskerdiş. Aye merheleya verêne ya têkoşînî de şahidî kerde û beşdarê xebatanê perwerdeyî bîye. Esma Murad 1999 ra nat, yanî roja ke Abdullah Ocalan esîr ame girewtiş ra nat, tena kincanê sîyayan xo ra dana. Bi no qayde reaksîyonê xo yê şexsî vera komployî mojnena. Esma Murade Ajansê Welatî rê qisey kerd.
‘Ma Rayber Apoyî ra rûmet û exlaq musayî’
Esma Murade bale ante rewşa cinîyan a verê felsefeya Abdullah Ocalanî ser o û wina vat: “Rayber Apoyî ma çinîbîyayîşî ra ardi estbîyayîş. Ma cinî keyeyan de girewteye bî; tena bi karê keyeyî û girdkerdişê domanan reyde mijûl bîni û ma dinya nêdîyêne. Wexto ke Rayber Apo vejîya, ma karê cebheyî û têkoşîn kerd. Ma kewtê mîyanê şarî û komelanê bînan.”
‘Pêvînayîşê Lubnanî’
Esma Murade behsê pêvînayîşê xo yê 1991î kerd ke Rayber Apoyî reyde Lubnan de bî: “1991î de ma şîyê Akademîya Mahsum Korkmazî yê Lubnanî. Ma uca Serekîye reyde roniştê; ey çend saetan behsê merhele kerd û vat: ‘Ma merheleyanê muhîman ra vîyarenê, merhele giran a. Ganî cinî bixebitîyê, têkoşîn bikerê, ganî cinî sey cinîyanê verênan nêbê û wayîrê heqanê xo vejîyê.’ Badê ke ma Serekîye dîye, ma berpirsîyarîya xo hîna rind fehm kerde û karê xo xurt kerd.”
‘Komployo mîyanneteweyî û qerarê kincanê sîyayan’
Esma Murade dîyar kerd ke wexto ke komplo ame kerdiş û fotografê Ocalanî yê çimgirêdayeyî ameyî weşanayîş, înan û heme şarê kurdan rê rojêka sîyaye û bi derd dest pêkerd. Aye wina vat: “O wext semedê tedaya rejîmê Baasî ma nêeşkayêne çalakîyanê girdan bikerê. Mi soz da û vat: heta Rayber Apo bi fîzîkî mîyanê şarê xo de azad nêbo, ewro ra pey cuye mi rê heram a. Mi kinc û çîyê rengînî pêro xo rê heram kerdî. Cîranan û keyeyan zaf rey cehd kerd ke mi qerarê mi ra peyser bigêrê. La mi qerarê xo ra qet game pey de nêeşte; mi soz dayo û ez do sozê xo biyara ca.”
‘Cuyêka bê Rayber Apoyî bêerj a’
Esma Murade bale ante Şorişê Rojavayî ser o ke bi felsefeya Ocalanî bîye şorişê cinîyan: “Raşt o, ma dayîkî nêwendeyî yê, la Rayber Apoyî ewro ma ardê heme meclîsan û waranê xebate. Ewro ma vînenê ke cinîyê 70 serreyî çekan genê milê xo ser û welat û taxa xo pawenê.” Esma Murade peynî de venga heme cinîyan da ke keyeyan de nêronişê û têkoşîn bikerê: “Heta ke ma Rayber Apo bi fîzîkî azad nêkerê, cuye ma rê heram a. Cuyêka bê Rayber Apoyî, se Kurdîstanî zî virazîyê, mi rê tu erjê ey çin o. Ma hêvî kenê ke nêzdî de Rayber Apo mîyanê şarê xo de azad bibo û ma bi coşêko gird ey pêşwazî bikerê.”
