Anqara – Dayîkê Aştî ke bi waştişê azadîya fîzîkî ya Rayberê Şarê Kurdî Abdullah Ocalan ameyî Anqara, vernîya Parka Meclîsî de venga îqtîdarî da ke sozê xo bîyaro ca û azadîya Rayberê Şarê Kurdî Abdullah Ocalanî garantî bikero.
Meclîsê Dayîkanê Aştî ke bi waştişê azadîya fîzîkî ya Rayberê Şarê Kurdî Abdullah Ocalan û eştişê gamanê şênberan ê Prosesê Aştîye û Komelê Demokratîkî 24 şaristananê Vakurê Kurdîstanî û Tirkîya ra ameyo Anqara, Parka Meclîsî de kom bî. Dayîkan verê eşkerayî bi deyîr û sloganan waştişê aştî kerd.
Dima dayîkan eynî cayî de eşkerayîyêk daye. Parlamenterê DEM Partî, endam û temsîlkarê partî û dezgehanê demokratîkan û zaf kesî beşdarê eşkerayîye bîyî. Dayîkan pankarto “Seba aştî game bierze” akerd û sloganê “Silav, silav ji Îmraliyê re hezar silav” û “Em şer naxwazin aştîyê dixwazin” vatî.
‘Ma wazenê proses bi aştî biqedîyo’
Dayîka Aştî Meryem Korkmaze eşkerayî de qisey kerd û waşt ke seba prosesê ke 2 serrî yo dest pêkerdo gamê şênberî bêrê eştene û vat: “Sozê ke ameyî dayene hema nêameyî caardene. Mîmarê nê prosesî Birêz Abdullah Ocalan o. Ma wazenê ke Birêz Abdullah Ocalan bi fîzîkî azad bibo û gamê şênber û hewceyî bêrê eştene. Proses vinderto, ma naye qebul nêkenê. Ma wazenê proses bi aştîye biqedîyo.”
‘Heta ke aştî nêbo ma tîya yê’
Dayîka Aştî Murvet Demîre zî da zanayene ke ê seba ke proses nêxeripîyo ameyî Ankara û vat: “Heta ke aştî nêbo ma tîya yê. Heta ke statuyê Rayberîye nêbo, hepsî nêrê verdayene û gerîlayî peyser nêrê ma tîya yê. Ma seba aştîye ameyî.”
Dayîka leşkerî piştî da çalakîya dayîkan
Kezban Kaline ke mêrdê aye leşker bîyo û lajê aye zî wextê leşkerîye de derbeyê 15ê temmuza 2016î de ameyo tepiştene û hepisxane de yo, beşdarê çalakî bîye. Kezban Kaline da zanayene ke heme kesî hewceyê aştî yê û vat: “Eke heme dayîkî aştîye biwazê tu kes nêeşkeno vera nê waştişî bêhîs hereket bikero.”
Badê eşkerayîye dayîkî seba çalakîya nobete şîyî konê ke Parka Kurtuluşî de ameyo ronayene.
