ÎFODî tesbît kerd ke aşmanê êlule û teşrîna verêne de bi pêroyî 2 hezar û 137 hesabê X’î ameyî astengkerdene.
Komeleya Azadîya Îfadeyî (ÎFOD) çarçewaya projeyê EngelliWebî de derheqê astengkerdişanê ke aşma teşrîna verêne ya 2026î de ameyî tesbîtkerdene, eşkerayîyêka nuştekî daye. ÎFODî eşkerayî de ke keyepelê xo de weşana, da zanayene ke 1-31ê teşrîna verêne ya 2026î de çarçewaya ,maddeyanê, 8. û 8/A yê Qanûnê 5651 hûmarî de tewr kêmî 867 hesabê X’î ameyî astengkerdene. Goreyê ÎFOD’î bi 1.270 hesabanê ke êlule de ameyî astengkerdene, hûmara hesabanê ke di aşman de ameyî astengkerdene resaye 2 hezar û 137. Komele îfade kerd ke eke merdim nê hûmare 4 hezar û 800 ra zêdeyêr hesabanê X reyde bido têver ke 2015-2025î de bi qerarê 8/A ameyî astengkerdene, astengkerdişê nê di aşmanê peyênan resayê nêzdîyê nîmeyê pêroyîya des serran ra zêdeyêr .
ÎFODî bale ante na raştîye ser o ke teşrîna verêne de hesabê rojnameger, dezgehanê xeberan, partîyanê sîyasîyan, akademîsyenan, avûkatan û şîrovekaranê ekonomî ameyî astengkerdene. Sewbîna hesabê kes û dezgehanê ke nameyê xo bedilnayo yan zî hesabêko newe akerdo, reyna ameyî astengkerdene. Mîyanê astengkerdişan de hesabê Halk TV, T24, Partîya Karkeranê Tirkîya û rojnamegeran ra teber hesabê ÎFOD û EngelliWebî zî est bî. Komele da zanayene ke qerarê derheqê hesabê EngelliWebî de vejîyayo meydan la qerarê derheqê hesabê ÎFOD’î de hema înan reyde nêameyo parekerdene.
Eşkerayîya çapemenî de qalê rastkerdişanê tesdîqkerdişê emrî û platformanê kayan ame kerdene ke 1ê teşrîna peyêne ya 2026î de kewtî merîyet. ÎFODî da zanayene ke xebitnayîşê medyaya komelkî bi e-Devletî ra tesdîqkerdişê emrî ra ame girêdayene, platformanê kayan rê mecburîyetê neweyî ameyî ardene û Steam de hûmara rîpelanê kayan ke Tirkîya ra ameyî astengkerdene, 28ê teşrîna verêne de resaye 767.
Qismê peyênê eşkerayî de nê îfadeyî ca girewtî: “Pêla ke êlule de dest pêkerd teşrîna verêne de zî dewam kerda, astengkerdişî tedeyîyan ra çarnayê kes û dezgehan bi xo. 1ê teşrîna peyêne ra nat resayîşê medyaya komelkî zî bi destê dewlete tesdîqkerdişê emr û nasnameyî ra girêdîyayo. Dadgehê Qanûnê Esasî qerarê Arti Media GmbHî de ([GK], B. No: 2019/40078, 14.09.2023) tesbît kerdo ke maddeyo 8/A vera mudaxeleyanê keyfîyan garantî nêdano û binpaykerdiş rasterast qanûnî ra yeno. Ê reyde zî no hukm her aşme seba bêvengkerdişê qismêkê hîna hîrayî yeno xebitnayene.”
Eşkerayî de waştiş û vengdayîşî wina ameyî rêzkerdene:
* Ganî hakimîyê cezayê sulhî wextê etudkerdişê îtîrazan de maddeyê 8/A goreyê maddeyê 152. yê Qanûnê Esasî berê Dadgehê Qanûnê Esasî.
* Ganî tetbîqê astengkerdişê pêroyî yê hesab û keyepelan biqedîyo.
* Ganî heme qerarî, verê her çîyî qerarê derheqê hesabê ÎFOD’î de, bi sebebanê xo reyde kesanê eleqedaran rê bêrê teblîxkerdene û raya pêroyî rê bêrê eşkerakerdene.
