Wan – Hunermendo namdar Delîl Dîlanarî bale ante muhîmîya mîrasê dengbêjîye û tesîrê Radyoyê Êrîwanî ser o û vat: “Amancê ma o yo ke kulturê dengbêjîye bi muzîkêko modern reyde bikerê yew û bidê heskerdene.”
Radyoyê Êrîwanî tarîxê kultur û muzîka kurdan de bî vîrêko bêhempa û bi vengê kilam û destanan sînorê welatan vîyarnayî. Egîdê Cimo sey Mîrê Bilûre bi vengê bilûra xo bî ganê kilamanê dengbêjanê girdan. Delîl Dîlanar zî no mîras hem radyo ra hem zî rasterast Egîdê Cimoyî ra girewt û dengbêjîya klasîke bi qirikêka qewetine û bi enstrumanan dewam keno.
‘Radyoyê Êrîwanî û Egîdê Cimo mekteb bîyî’
Dîlanarî da zanayene ke wexto ke Radyoyê Êrîwanî weşan kerdêne kurdkî qedexe bî, televizyon û radyoyê kurdkî çin bîyî û vat: “Pîlanê ma, dengbêjanê ma mîrasêko gird verda. Wexto ke ez şîya Rûsya û Ermenîstan mi Egîdê Cimo şinasna û o bî mamosteyê mi. Tecrube û keda ey ma ser o tesîrêko gird kerd.”
‘Ganî dengbêjî û muzîka moderne bêrê têhet’
Dîlanarî vat ke ganî ciwan û neslê neweyî wayîrê nê mîrasê dengbêjîye bivejîyê: “Ganî şarê kurdan û bitaybetî ciwanê ma bizanê ke bingeyê hunerê muzîka kurdkî dengbêjî ya. La no nêbeno karêko amatorî. Vengê merdimî weş bo zî eke muzîke nêzano û nêeşkeno aranje bikero nêeşkeno aver bero.”
Dîlanarî da zanayene ke çend rojan ra ver Îstanbul û Amed de konserî dayî û bi hezaran kesî ameyî û vat: “Konseranê ma de domanê 6-7 serreyî û dayîk û pîyê 70-80 serreyî pîya amade yê. No mojneno ke berpirsîyarîyêka girde milê ma ser o ya. Ma qet poşman nîyê ke ma no kar kerdo; nika ra pey ma do hîna zaf seba hunerê kurdan bixebitîyê.”
