Rêxistinanê DBP û DEM Partî yê qezaya Kanîreşî vizêr şayîya dengbêjan viraşte. Şayî de vengdayîşî dengbêjîye ra wayîr vejîyayîşî ame kerdene û dengbêjan bi kilamanê xo zereyê komele germ kerd.
Rêxistina Partîya Herêman a Demokratîke (DBP) û rêxistina DEM Partî ya qezaya Kanîreşa Çewlig de vizêr kombîyayîşê dengbêjîye organîze kerd. Şayîya dengbêjî qehwexaneyêkê qeza de ame viraştene. Rayberê DBP û DEM Partî yê Kanîreşî û Çewligî û bi seyan welatî terba şayî bîyê. Reya verêna ke bi pêşengîya her di partîyan, şayîyêka nîyanêne bena.
Dengbêjî herêma Kanîreşî û ‘Mala Dengbêjan a Amedî’ ra dengbêj Brahîmê Pîrîkê zî terba şahîye bîyê.
Şayî de dengbêjê ke cuya xo vîndî kerda, ameyê yadkerdiş. Bi taybetî zî dengbêj Sidîqê Bozo yo ke Kanîreşe de serra 1994î de cuya xo vîndî kerdbî, ame vîrardene.
‘Ma kulturê kurdkî gandar verdê’
Şayî bi qiseykerdena Hemserekê DBP’yî yê Kanîreşî Ozkan Bîngolî dest pêkerd. Ozkan Bîngolî bale ante amancê şayî ser o û dîyar kerd ke ê seba ke şarê xo bîyarê têhet û pîya wayîrtîya kultur, huner, ziwan û tarixê şarê kurdî bikerê na şayî organîze kerda. Ozkan Bîngolî va Kanîreş tarîxê xo de çimeyê dengbêjîye kerda û ê wazenê ke kulturê dengbêjîye qezaya xo de gandar bikerê û vat: “Ma wazenê ke qezaya xo de her aşme yew şayî bivirazê û hamnanê vernîya ma de zî Festîvala Akewtişê Tîje bivirazê.”
Qiseykerdena Ozkan Bîngolî ra dima goşdarikerdişê dengbêjan dest pêkerd û dengbêjan zî qiseykerdena xo de va ke ma nêwazenê ke kes kulturê dengbêjîye ra durî bikuwo.
Dengbêjan bi kilamanê xo zerêyê civate germ kerd
Dengbêj Brahîmê Pîrîkî, dengbêj Hecî Mihyedîn, dengbêj Emerê Baxçe, dengbêj Îmdat, dengbêj Osmanê Alpîra, dengbêj Eliyê Bîngolê, dengbêj Şemsedînê Erebo û stranbêj Halîl Bayindir bi dore kilam û deyîrê xo vatî.
Dengbêjan hem kilamê ceng hem kilamê eşq û hem zî kilamê folkolorîk vatî û keyf da civate.
