Îstanbul – TOHAV’î seba avûkatanê Kurdan ê ke ameyê qetilkerdiş panelêk organîze kerd. Panel de ame îfadekerdiş ke ganî wayîrê mîrasê têkoşînê avûkatanê ke canê xo dayê bivejîyê.
Weqfê Cigêrayîşanê Komel û Huquqî (TOHAV) seba vîrardişê avûkatanê ke aşma teşrîna peyêne de ameyê qetilkerdiş, binaya weqfî ya qezaya Beyoglu ya Îstanbulî de panelêk viraşt. Nê avûkatî Medet Serhat, Şevket Epozdemîr û Tahîr Elçî yê. Merdimê avûkatanê ke ameyê kiştiş, huquqnasî û zaf pawitoxî tewrê panelî bîyî.
Panel de avûkat Mahsun Bati û Hîkmet Epozdemîrî qisey kerd.
‘Têkoşînê ey zaf kesan rê bî hêvî’
Verê cû Mahsun Bati qisey kerd. Mahsun Bati dîyar kerd ke aşma teşrîna peyêne de zaf kesê muhîmî merdê û wina va: “Ewro serrgêra kiştişê Ugur Kaymazî zî ya. Serra 1996î de mi Tahîr Elçî nas kerd. Kesê ke ey nas kerdêne, zanayêne ke Tahîr Elçî kesêko cîya yo. Têkoşînê ey zaf kesan rê bî hêvî. Ganî ma mîrasê ey dewam bikerê. Derheqê ey de zaf çî eşkenê bêrê vatiş la her tim kêmî manenê.”
‘Ê qet vîr ra nêyenê kerdiş’
Hîkmet Epozdemîrî zî ard ziwan ke na aşme de zaf avûkatê Kurdî ameyê qetilkerdiş û wina va: “Ganî nameyê sey Faîk Candan û Yusuf Ekîncî zî bêrê vîrardiş. Ê welatperwer bîyî, Kurd bîyî, seba welatê xo têkoşîn kerdêne. Medet Serhat zî avûkatêko zaf xebatkar û bêters bî. Ey qet mabênê merdiman de cîyakerdiş nêkerdêne. Înan ê qetil kerdî. Ê qet vîr ra nêyenê kerdiş.”
Panel bi mojnayîşê fîlmêkê dokumanterî qedîya.












