Amed – Seba kedkaranê ke bi KHK’yan kar ra ameyê vetiş, çalakîyêk ame kerdiş. Çalakî de ame îfadekerdiş ke polîtîkaya îxracî bi xorînîya xo ya cinsîyetî hêrişêko vera keda cinîyan a.
Platforma Şubeyanê Amedî ya Konfederasyonê Sendîkayanê Kedkaranê Kamuyî (KESK) bi sloganê “KHK’î do şêrê, ma do bimanê” çalakîya xo dewam kena. Çalakîya 180. qezaya Yenîşehîrî, Mehleya Ofîsî de verê AZC Plazayî de ame kerdiş. Eşkerayîye de reyreyan sloganê “Îxracê KHK’yî şerefê ma yê” û “Cinî, cuye, azadî” ameyî eştiş.
Eşkerayîye Sekretera Şubeya Numre 1 ya Amedî ya Sendîkaya Kedkaranê Perwerde û Zanistî (Egîtîm Sen) Arzu Koçe wende. Arzu Koçe bale ante ser ke qerarê keyfîyî yê Komîsyonê Halê Awarteyî (OHAL) bi destê hukmî dewam kenê û vat: “Zextê îqtîdarê AKP-MHP’yî yo ke hukmî ser o yo, beno sebebê dewamkerdişê bêhuquqîya KHK’yan.”
‘Zextê cinsîyetperestî’
Arzu Koçe wina qisey kerd: “OHAL û KHK’î serran ra nat bîyê hacetê polîtîkayanê dişmenîya cinîyan ê îqtîdarê sîyasî. Hêrişî warê sîyasî, ekonomîk û sosyal de destkewteyan û rêxistinbîyayîşê cinîyan kenê hedef. Teberê înan, warê kedî de zî zext û polîtîkayê cinsîyetperestî yenê ramitiş. Amancê nê zext û polîtîkayan no yo ke cinîyan heme warê komelkî ra teber bikerê û mecbûrê îtaetê mutleqî bikerê. Sebebê tesîr û hêzê cinîyan ê ke komelî vurnenê ra, vera têkoşînê cinîyan ê rêxistinbîyayeyî ewnîyayîşêko hîna hêrişkar û heyfgêr yeno mojnayîş.”
Arzu Koçe dîyar kerd ke heta ke kedkarê kamuyî yê ke îxrac bîyê, ê peyênî zî agêrê karê xo, ê do têkoşînî dewam bikerê.










