Sultan Bozkurte, ke Ankara de seba raverdayîşê hepsîyanê nêweşan çalakîya roniştişî de ca girewt, vat ke rewşa keyna aye giran a, doktoran vato ke dermankerdişê aye mecbûrî nîyo ke nêweşxane de bibo. Se mecbûrî nîyo? Eke gedeyê înan bîyêne, do çi bikerdêne?
Dayîka hepsîya nêweşe Newroz Bozkurte, Sultan Bozkurte, Wezîrê Dadî ra pers kerd: “Wexto ke hepsîyêko nêweş xo ser o hewceyîyanê xo nêşkeno temîn bikero, nêweşxane de mendiş senî mecbûrî nîyo? Eke domanê înan bîyêne, do çi bikerdêne?”
Rewşê hepsîyanê nêweşan hepisxaneyan de roj bi roj giran beno. Newroz Bozkurta, ke 28 serrî yo hepisdeya û nika Hepisxaneya Sîncanî de ya, lozemîya kronîke ra nêweş a û nika Nêweşxaneya Bajarî ya Etlîkê de yena dermankerdene. Hepsîya nêweşe Evîn Zapsû zî, ke Hepisxaneya Bunyanî ya Qeyserî de kanser ra nêweş a, çendê nayera ver birîyabî nêweşxane, labelê tevî ke nêweşîya aye dewam kena, reyna zî berda hepisxane.
Keyeyê hepsîyanê nêweşan, TUHAY-DER’î, OHD’î, ÎHD’î û DEM Partîyî seba raverdayîşê hepsîyanê nêweşan û amadekerdişê dermankerdişê înan çalakîya roniştişî ya bêdeme dest pêkerd. Çalakî 4 rojî yo ke Wezareta Dadî ver de dewam kena.
‘Heta ez bieşkî, ez do çalakî de bimanî’

Sultan Bozkurte vat ke ey keyna xo û heme hepsîyanê nêweşan rê Ankara de roja dişemeyî ra nahet çalakî kenê û aye tena roja verêne keyna xo dîya. Bozkurte vat ke tevî giranîya nêweşîya keyna aye, înan nêberda nêweşxane berda revîre; aye vat ke nirxê gonîya aye kêmî bîyê û aye tena 9-10 deqîqeyan keyna xo dîya. Bozkurte vat: “Heta hepsîyê nêweşî nêrê raverdayene, ma çalakîya xo domnenê; heta ez bieşkî, ez do çalakî de bimanî.”
‘Hepsîyê nêweşî bêrê raverdayîş, ma înan teber de derman bikerê’

Cemîle Çîftçî zî, ke waya hepsîyê nêweşî Selîm Çîftçî ya, vat ke birayê aye 28 serreyo ke hepisxane de yo û nêweşo. Biraye aye bi goreyê raye û dirban nêyeno dermankerdene. Çîftçîye vat: “Ma Prosesê Aştîye ra qisey kenê, labelê hema dewlete tu game nêeşta. Hepsîyê nêweşî bêrê raverdayîş, ma înan teber de derman bikerê.”










