Ankara – Hepsîyo nêweşî Tuncer Saglam 7ê teşrîna peyêne de merdbi. Lajê apê ey Ercan Saglam tewrê çalakîya seba texlîyebîyayîşê hepsîyanê nêweşan bî. Ercan Saglamî dîyar kerd ke lajê apê ey sebebê îhmalanê îdareyê hepisxaneyî ra merd û vat: “Ma no derd ante la ma nêwazenê ke tu keyeyê ma no derd biancu. Coka ma wazenê ke heme hepsîyê ma yê nêweşî texlîye bibê.”
Hepisxaneyan de caardişê îhlalkerdişê heqan vera hepsîyanê sîyasîyan bê vindertiş dewam kenê. Herçiqas ke nêweşîya hepsîyanê nêweşan giran a û hewcedarîyanê xo bi xo nêeşkenê bica bîyarê zî, ê texlîye nêbenê û Heyetê Îdare û Teftîşî yê Hepisxaneyan texlîyebîyayîşê hepsîyanê sîyasîyan rê beno asteng. Goreyê hûmaranê Komeleya Heqanê Merdiman (ÎHD), hepisxaneyan de 1 hezar û 412 hepsîyê nêweşî est ê. Înan ra nêweşîya 335 hepsîyan giran a, 230 hepsîyî hewcedarîyanê xo bi xo nêeşkenê bica bîyarê û ganî 188 hepsîyê nêweşî her tim binê çimdarîya tibî de bê. La herçiqas ke nêweşîya înan giran a zî hepsîyê nêweşî texlîye nêbenê. Zaf hepsîyan rê raporê “Hepisxane de nêeşkeno bimano” est o zî hetê îdareyê hepisxaneyan ra texlîyebîyayîşê înan yeno astengkerdiş.
Hepsîyê nêweşî Tuncer Saglam Hepisxaneyê Wanî de tepişîyaye bî. Herçiqas ke nêweşîya ey giran bîye zî, texlîye nêbî. Seba ke nêweşîya ey giran bîye, Tuncer Saglam sewqê hepisxaneyêkê Ankara bî û 7ê teşrîna peyêne de Xestexaneyê Şaristanî yê Etlîkî de merd. Sewbîna hepsîya nêweşe Evîn Zapsu Hepisxaneyê Kayserî de tepişîyaye ya. Badê netîceyanê bîyopsîye ame tesbîtkerdiş ke a nêweşa kanserê asta 4. a. Herçiqas ke rewşa Evîn Zapsu giran a zî, a reyna sewqê hepisxane kerde û bi nêweşîyanê giranan hepisxane de tepişîyaye ya. Hepsîya nêweşe Newroz Bozkurte 28 serrî yo ke hepisxane de ya. Aye de Losemîya Lenfosîtîke ya Kronîke (KLL) est a û sebebê rewşa aye ya girane ra Xestexaneyê Şaristanî yê Etlîkî de yena tedawîkerdiş.
Sebebê rewşa hepsîyanê nêweşan ra, keyeyanê hepsîyanê nêweşan, Komeleya TUHAY-DER, Komeleya Huquqnasan a Seba Azadîye (OHD), Komeleya Heqanê Merdiman (ÎHD) û DEM Partî verê Wezaretê Edaletî de çalakîyêka roniştişî ya bêmudet dest pê kerde. Çalakîya ke bi waştişê texlîyebîyayîşê hepsîyanê nêweşan bena, roja 5. de dewam kena. Keyeyê hepsîyanê nêweşan zî şaristananê cîya-cîyayan ra tewrê çalakîye benê. Na hewte keyeyê hepsîyanê nêweşan û Dayîkê Aştîye yê Îstanbulî tewrê çalakîye bîyî; hewteyo ke yeno zî keyeyê hepsîyanê nêweşan do Amed ra bêrê Ankara û tewrê çalakîye bibê. Keyeyê hepsîyanê nêweşan do nobet bi nobet bêrê Ankara û tewrê çalakîye bibê.
‘Seba ke tedawîyêka başe nêame kerdiş, merd’
Lajê apê hepsîyê nêweşî Tuncer Saglamî Ercan Saglam ke tewrê çalakîye bî, ard ziwan ke lajê apê ey seba ke tedawîyêka başe nêdîye, merd û wina qisey kerd: “4 aşmî yê ke ez bê vindertiş lajê apê xo reyde xestexane de bîya. Na rewşe mi ser o tesîrêko pîl kerd. Heta ke embazê ma yê hepsîyê nêweşî Evîn û Newroze nê şertan de hepisxane de bê, zerrîya ma rehet nêbena. Seba ke embazê ma bêrê tedawîkerdiş û weş bibê, ganî ma her tim mîyanê çalakîyan de bê. Ganî heme hepsîyê nêweşî texlîye bibê û teber de tedawîya xo bivînê.”
‘Ma no derd ante, ma nêwazenê ke tu keyeyê ma no derd biancê’
Ercan Saglamî dewamê qiseykerdişê xo de dîyar kerd ke sebebê şertanê hepisxaneyî ra nêweşîya lajê apê ey Tuncer Saglamî 5 aşman teşhîs nêbîye û qiseykerdişê xo wina dewam kerd: “Îhmalêko pîl estbî. Vanê ma xestexaneyî viraştê la xestexane de doxtorî çin ê, cîhazî çin ê. Her çiqas ke teknolojî hende aver şîya zî 5 aşman de nêweşîyêk teşhîs nêbîye. Ma fam kenê uca îhmal est o. No îhmal çi yo? Yan înan îhmal kerdo, yan înan de cîhazî çin ê, yan zî xestexaneyê înan veng ê. Ma no derd ante la ma nêwazenê ke tu keyeyê ma no derd bianco. Coka ma wazenê ke heme hepsîyê ma yê nêweşî texlîye bibê.”
‘Her çiqas ke rewşa ey giran bîye zî waşto ke xestexane ra sewqê hepisxane bikerê’
Ercan Saglamî vera cehdê îdareyê hepisxaneyî nêrazîbîyayîşê xo mojna û wina vat: “Herçiqas ke rewşa embaz Tuncerî giran bîye zî îdareyê hepisxaneyî waşt ke ey xestexane ra bişawo hepisxane. Servîsan ey qebul nêkerdêne. Înan vatêne ‘teşhîs nêbîyo, ma nêeşkenê bigîrê’. Seba ke embazê ma kewtî dewre, ey erşawitî Kampusê Xestexaneyê Hepisxaneyî. Badê 4-5 rojan reyna ardî Xestexaneyê Şaristanî yê Etlîkî. Bi na rewşe zî înan vatêne ‘ma do ey berê qawîşê hepsîyan’. Ma no çî qebul nêkerd û înan ey berd xestexane û uca zî merd.”
‘Bi nê caardişan umîdê ma zî şikîyenê’
Ercan Saglamî peynîya qiseykerdişê xo de seba piştdayîşê çalakîya seba texlîyebîyayîşê hepsîyanê nêweşan şarî rê veng da û qiseykerdişê xo wina qedêna: “2 serrî yê ke prosesêk dest pê kerdo. Bi nê prosesî ma hêvîdar ê. La hesasîyetê prosesî hepisxaneyan de çin o. Ma wazenê ke hepisxaneyî veng bibê û bitaybetî hepsîyê nêweşî tavilî texlîye bibê. Bi nê caardişan hêvîyê ma zî şikîyenê. Ma şarê xo rê veng danê, heta ke hepsîyê nêweşî texlîye nêbê, çalakîyan ra dest meverdê.” Her tim kuçeyan de bê, seba hepsîyanê nêweşan haydar bê û vengê xo berz bikerê.”









