Çewlig – Qezaya Çewligî Kanîreş de badê 12 serran ra bi tewrbiyayîşê hezaran welatijan Festîvala Kultur û Xoza ame viraşten. Beşdaranê festîvalî dîyar ke ê semedê ganîbiyayîşê kultur û adetanê xo zaf keyfweş ê û waşt ke programê winayînî merkezê Çewligî û qezayanê binan de zî dewam bikerê.
Qezaya Çewligî Kanîreş de ke bi xozaya xo, zafrengîya xo ya kulturî û kozmopolît yena şinasnayene, tewr peyên tebaxa 2014 de Festîvala Kultur û Hunerî yê Karacehennem amebî viraştene . Semedê tedayanê sîyasîyan, qedexeyê serê çalakîyanê kulturî û polîtîkaya qeyûman, badê 12 serran ra 23 û 24ê temmuze de Festîvala Kultur û Xoza ya Kanîreşî virazîya. Festîval de panelan ra heta goşdarîkerdişê dengbejan, konseranê giseyî ra heta vazdayîşê estoran, pragramê cîya cîya ameyî viraştene. Dengbêj Alî Tûrgût û Îmdat Bîngol û Hemserekê DEM Partî yê Çewligî Sedat Ormangoren ke tewrê festîvalî biyê, derheqê festîvalî û talankerdişê xoza ya qeza û dewanê aye de ajansê ma rê qisey kerd.
‘Semedê ganîbiyayîşê kultur û adetanê xo zaf keyfweş ê’
Dengbêj Alî Tûrgût ke dewa Baxçeyê Kanîreşî ra yo, diyar kerd ke ê semedê ganîbiyayîşê kultur û adetanê xo zaf keyfweş ê û va ke nê aktîvîteyî benê wesîleyê têhetameyîşê dost û cîranan. Alî Tûrgûtî bale ant festîvalanê vernîyan ser û dîyar kerd ke 30-40 serrî verê cû nê adetî bi şiklêko gandar dewam kerdêne la dima astengî vejîyaye meydan û va ke ewro azadîya qiseykerdişî bi ziwanê dayîke û şinasnayîşê kulturî zaf muhîm o. Sewbîna, Alî Tûrgûtî qiseykerdişê xo de vera talankerdişê xoza û viraştişê JES’an reaksîyon mojna û va ke nê projeyî zerar danê cayanê keskgehan, daristanan û weşîya komelî û cografyaya înan xirabe kenê; aye ra ê qet bi tu qeydeyê nê santralan dormeyê xo de nêwazenê.
‘Dengbêjî hikaye, tarîx û nasnameyo qedîm ê komelî yo’
Îmdat Bîngolî dîyar kerd ke dengbêjî tena deyîre adetî nîyê, ê bi xo tarîx, hîkaye û nasnameyo qedîm ê komelî ya û dîyar kerd ke eke dengbêjî vîndî bibo, tarîx û ziwanê dayîke zî vîndî benê. Dengbêj Îmdat Bîngolî kêfweşîya xo ya seba pawitişê xozaya pake û cografyaya Kanîreşî zî ard ziwan û dîyar kerd ke sîstemo newe yê jeotermalî serê menfeetanê şîrketanê girdan awan bîyo. Îmdat Bîngolî va ke ne tena Kanîreş de, Gimgim, Mûş û dorûver de zî tu kes nê projeyanê talankerdişê erdan nêwazeno û paştîdayena xo ya seba dezgeh û merdimanê ekolojîstan nîşan da.
‘Şar bi heyecanêko gird wayîrê festîvalî vejîya’
Hemserekê DEM Partî yê Çewligî Sedat Ormangorenî zî bale ante serêe muhîmîya viraştişê festîvalî ya badê 12 serran û wina vat: “Na çalakî, vera waştiş û hesretê şarî yê kultur, ziwan û partîya înan de cewabêko gird o. Dimayê astengî û tedayanê serranê vîyarteyan, taybetî badê mesaj û averşîyayîşê sîyasî yê peyênan de rehetîyêke mîyanê komelî de virazîya û şar bi heyecanêko gird wayîrê festîvalî vejîya.
Sewbîna Sedat Ormangorenî dîyar kerd ke nê çalakîyê ke bi panel, govend, sohbetê ekolojîk û deyîrê dengbêjan Kanîreş de û zozananê Çermeyî de dest pekerdo, do Merkezê Çewligî û qezayanê bînan de zî dewam bikero.”
