Xarpêt – Dewijanê Nerbişî ya qezaya Mîyaran a Xarpêtî talankerdişê xozaya Gorseyî ser o qisey kerd û vat: “Dewlete ne binê erdî verdayo ne zî serê erdî; her çî talan kerdo, nika zî çimê xo daranê ma ra kerdo.”
Dorûverê Koyê Gorseyî de ke mabênê dewa Pîrejman ya qezaya Pîranî ya Amedî û dewa Nerbişî ya qezaya Mîyaran (Arıcak) ya Xarpêtî de yo, darî hetê Mudirîya Daristanan a Xarpêtî ra yenê birnayîş û daristan yeno talankerdiş.
Mudirîya Daristanan a Xarpêtî 15ê tebaxe de seba birnayîşê daristananê herême ke verê dewa Nerbişî de, mîyanê Koyê Gorseyî de yê, îhaleyêk kerde. Çarçewaya netîceya nê îhaleyî de 14ê êlule de herême de birnayîşê daran dest pêkerd û daristan yeno talankerdiş. Mudirîya Daristanan a Xarpêtî wexto ke îhale kerde, akerdişê rayîrê ke şono mîyanê daristanî zî girewt xo ser û şirketa ke îhale girewte rê heta mîyanê Koyê Gorseyê Qijî rayîr akerd.
Seba ke Gorse de daristan talan beno, vizêrî şarê dewa Nerbişî, şarê Pîranî û Meclîsê Ekolojî cayê ke darî tede yenê birnayîş de çalakî viraşte. Dewijanê Nerbişî nê babetî ser o ajansê ma rê qisey kerd.
‘Dewlete verê cû erdê ma veşnayî, nika zî daranê ma birnena’
Xalit Gulşenî dîyar kerd ke daristanê dewa înan pêro bi destê dewlete yenê birnayîş û wina vat: “Dewlete verê cû erdê ma veşnayî, nika zî daranê ma birnena. Ma no çî qebul nêkenê. Wa şarê ma zî piştî bido ma. Nika vanê heta boxazî darî yenê birnayîş; yanî vajê ke darî pêro yenê birnayîş. Ma birnayîşê daran qebul nêkenê la dewlete reyna zî birnena. Ewro zî seba ke ma birnayîşê daran qebul nêkenê, ma tîya yê. Ma tîya ciwîyenê; heywanê ma est ê, ma înan tîya çerênenê. Ma debara xo bi nê daristanî kenê. Ma seba birnayîşê daran têkoşîn zî kenê la nêyeno qebulkerdiş. Tu kes wayîrê ma nêvejîyeno. Ma tîya ra venga her kesî danê: Wa bêrê wayîrê ma vejîyê û birnayîşê nê daristanî vindarnê.”
‘Darî kokan ra yenê birnayîş’
Ahmet Yucelî (67) bale ante qetlîamê daristanê Gorseyî ser o û wina vat: “Ma qetlîamêkê winasî hema nêdîbî. Çunke tîya darî kokan ra yenê birnayîş. Dar ke reyêk kok ra bêro birnayîş, êdî uca dar nêvejîyeno. Vanê ma darê pîrî birnenê la darê ke ameyê birnayîş pêro ciwan ê; nêm metre ra dergêr nîyê, pêro çilê zirav ê. Mîyanê daristanî de rayîrî viraştê, erebeyî şonê mîyanê daristanî û daristan de dar nêverdayo. Heyf û guneh o nê daristanî rê. Destê ma ra tu çî nêyeno. La ma seba vindarnayîşê nê birnayîşî venga şarê xo û parlamenteran danê: Wa bêrê piştî bidê ma ke ma nê talanî vindarnê. Erdogan vano ‘ez dewijan rê erj dana’; koti de yo? Ma şîyê verê qaymeqamî û ma vat ke no vindarnê; vano ‘îhale bîyo, qedîyayo’. La eke biwazê, eşkenê îhaleyî betal bikerê. Ma heta nê wextî nêverdabî yew kese destê xo bido nê daran. Ê ewro yenê û daristanî qetil kenê. Nê darî pêro oksîjen ê, cuye yê. Ma seba nê oksîjenî dewe de ciwîyenê. Eke daran bibirnê, oksîjen zî qedîyeno.”
‘Dewlete ne binê erdî verdayo ne zî serê erdî’
Ramazan Guzelî vat ke merdimê xerîbî teber ra yenê û daranê înan birnenê û wina dewam kerd: “Verê cû daristanê ma veşnayêne, dewlete nêverdayêne ke ma înan hewna bikerê; ewro zî daranê ma roşena. Serran ra nat kal û kalikanê ma nê daristanî pawito; ewro dewlete dewijan rê vana ‘no yê şima nîyo, yê ma yo’. Nika tîya daran birnenê; meşte zî yenê vanê ‘tîya rût o, dar çin o’ û maden gêrenê. Dima madenê zehîrinî vejenê û o zehîr kewno mîyanê awe. O wext heywanê ma a awe şimenê û zehîrin benê. Dinya de no maden qedexe bîyo la Xarpêt de çar koşeyan ra no maden kewno mîyanê awan. Dewlete ne binê erdî verdayo ne zî serê erdî; her ca talan kerdo. Nika zî çimê xo daranê ma ra kerdo. Seba ke 5 qurişî qezenc bikerê, daristananê ma talan kenê.”
