Elîşêr Hêlînî hûmara 9. ya Kovara Ozgur Halk de nuşteyê xo yê bi sernameyê “Sey Gêrayîşêkê Azadîye Agêrayîşê Xoza” de vat ke krîzo ekolojîk netîceya rasteraste ya fehmê sermîyandar û îqtîdarperestî yo ke xoza talan keno.
Elîşêr Hêlînî nuşteyê xo de têkilîya merdim, komel û xoza, krîzo ekolojîk û fehmê cuya azade erjnayî. Hêlînî vat ke vera talanê sîstemê kapîtalîst, rayîro tekane yê xelasîye awankerdişê cuyêk o ke xoza reyde pê bigîro.
Hêlînî vat: “Têkşîyayîşê hemsengîya ekolojîke û xoza ra dûrîkewtişê merdimî tesadufî nîyo; netîceya rasteraste ya fehmê dewletperest û sîstemê sermîyandarî yo. Sîstemo serdest seba menfeetanê xo yê ekonomîkan xoza sey çîyêkê bêganî vîneno û bêserûber talan keno. Wexto ke merdim xoza ra dûrî keweno, eynî wext de cewher û azadîya xo ra zî dûrî kewno.”
Hêlînî vat ke çareserîyê ke sermîyandarî bi xo pêşkêş kena, krîzî hîna têmîyan kenê: “Vera nê talanî, rayîro tekane yê awankerdişê cuya azade vurnayîşê fehmî û averberdişê hişmendîyêka ekolojîk o ke xoza sey parçeyêkê cuye vînena.”
Hêlînî dîyar kerd ke xoverdayîşê vera qirkerdişê ekolojîkî rasterast têkoşînê azadîye bi xo yo: “Wexto ke komel vera talanê xoza wayîrîya herre, awe û daristananê xo bikero, planê kolonyalîzmî yê kapîtalîzmî do puç bibo.”
Hêlînî vat ke azadîya komelî û azadîya xoza yewbînan ra qet nêyenê cîyakerdene: “Seba ke ma nê krîzo xorîn ra vejîyê, ganî cuya xo ya rojane de agêrê cewherê xo. Cuya azade tena mîyanê xozayêka azade de û bi hişmendîyêka ekolojîke mumkun a.”
Hêlînî peynîya nuşteyê xo de venga xurtkerdişê têkoşînê ekolojîkî da: “Agêrayîşê xoza, eynî wext de ageyrayîşê azadî û cewherê merdimî yo. Nika wextê ci yo ke ma bi îradeyêko ekolojîk ameyoxê xo newe ra awan bikerê.”
