Amed – Rêzefîlmê “Pirsên Azad” 12ê teşrîna verêne ra pey bi 13 beşan Zarok TV de do bêro weşanayene. Dublajê rêzefîlmî bi kirdaskî yo û reya verêne vîdeoyê ey bi zîrekîya viraşteye ameyê hedrekerdiş.
Rêzefîlmê “Pirsên Azad”, ke rejîsorîya ey Ceren Asik Demîre kerda, 12ê teşrîna verêne de Zarok TV de dest bi weşanî keno. Anîmasyon do her hewte bi beşêko newe bêro serê ekranî. Rêzefîlm seba domanan ame hedrekerdene; qehremano meraqdar Azad bi persanê xo cuya rojane ra heta komelnasî, felsefe ra heta fîzîk berê war û dîsîplînanê cîyayan akeno. No rayîrşîyayîş kuçeyanê kerranê Mardînî ra heta Pira Malabadî, Baxçeyanê Hewselî ra heta xorînîya ezmanî derg beno. Rêzefîlm herundeya cewabanê hazîran de temaşekerdoxan dawet keno ke pers bikerê, cigêrayîş bikerê û cewabanê xo bigêrê.
‘Rojhelat û Rojava pîya qisey kenê’
Rayîrşîyayîşê Azadî de el-Bîrûnî û Lévi-Strauss, Îbn Xeldûn û Durkheim, Îbn Heysem û Newton kenarê yewbînan de qisey kenê. Rêzefîlm tarîxê zanistî bi şeklêk yewmerkezî û yewvengî îzah nêkeno; temaşekerdoxanê ciwanan rê mojneno ke cografyaya înan zî zanistî rê ardim kerdo.
‘Hîkayeyêk ke bi destê merdiman ameyê hedre kerdiş, zîrekîya viraşteye xêz kerda’
Vîdeoyê projeyî bi hacetanê zîrekîya viraşteye ameyê hedrekerdene. Senaryo, montaj, dublaj, muzîk û mîksaj pêro bi keda merdiman ameyê hedrekerdene. Ekîba projeyî zîrekîya viraşteye sey hacetêk vînena ke astengê verê viraştişê anîmasyonêk bikalîte bi ziwanêk bêavantaj wedarena.
‘Meraq bi ziwanê dayîke’
Berardişî zaf kêm ê ke domanê kurdzanî bi ziwanê xo pê zanistî keşf bikerê. Zarok TV serran o bi ziwanê domananê kurdan weşan keno; “Pirsên Azad” wazeno bi Zarok TV na vengî tayê pirr bikero. Rejîsore Ceren Asik Demîre rêzefîlmî ser o wina vat: “Her doman bi persan pîl beno; ma zî waşt ke domanî bi ziwanê xo yê dayîke cewabanê nê persan bigêrê. Ez hêvî kena ke meraqê Azadî bibo meraqê her domanê ke verê ekranî de yo.”
Merheleya dîzaynê vîzuelî û anîmasyonî hetê rejîsor Ceren Asik Demîre û Erdal Tîmûrî ra ameye îdarekerdene. Senaryoyê rêzefîlmî M. Darayî nuşto. Kawa Cengîz Yildizî karakterê Azadî rê veng dayo; rejîsorîya dublajî zî Cebar Alpî kerda. Muzîka anîmasyonî Kendal Adiguzelî, Eylul Nazliere û Sîmyagerî hedre û îcra kerda.
