Qezaya Sûrî ya Amedî de bi hemkarîya Komeleya “Berî Her Tiştî Zarok û Zarok TV”yê xebatêke seba nuştena gedeyan yeno kerdene. Gedeyêkî beşdarê karê nuştena sanikan û dramayî benê, hedreyîya hûmara 2. a kovara “Nivîskarên Biçûk” kenê. Kovara ke heme nuşteyê xo hetê gedeyan ra yênê nuştene, 12yê êlule de vejîna.
Sûr de 3 serrî yo bi hemkarîya Komeleya “Berî Her Tiştî Zarok û Zarok TV”yî, kargehê cîya yê edebîyat, drama û hunerî yênê organîzekerdene. Nê kargehan de nêzdîyê 50 gedeyê ke Sûr de mîyanê îmkananê kemîyan de cuyenê, bi hetkarîya mamostayan sanik û şîîranê xo nuşenê. Gedeyî teyna sanikan nênusenê, eynî wextî de sanikê ke nuştê ê sanikan kenê kayê drama û kayî kenê.
Nê sanikî yew ca de ameyê komkerdene û ameyî redektekerdene, nika zî amedekarîya sey kovare bêro weşanayene kenê. Endamê Heyetê Weşanî yê Zarok TV’yî Cebar Alpî hûmara 2. yê kovara “Nivîskarên Biçûk” û serê xebatanê xo ser o qisey kerd.
Gedeyî hem sanikanê xo nusenê û hem zî kayî kenê
Cebar Alpî îfade kerd ke ê tena hîrê serrîyo ke atolyeya gedeyan virazenê û wina vat: “Ma sey Zarok TV’yî taybetî Amed de nê xebatan kenê û wazenîme ke teberê Amedî zî bibim. Rewşa nikayî yê Amedî de ma nê kargehan de drama, dûblaj, viraştena kûkla, musayena ziwanî û nuştena sanik û şîîran danîme musnayene ke nuştoxê gedeyî beştarê atolyayanê ma bibê. Gedeyî yenê tewrê atolyeya dûblajî benê û sanikan nusenê. Her hewte sanikanê xo anê; ma ey sanikan kenîme kayî û dramaya xo nê sanikanê gedeyan ser o awan kenê. Sey atolye ma bi nê rengî xebetînîme, peynîye de ma sanikanê heme gedeyan kom kenê, redekte kenê û dima ra zî kovare de çap kenê. Serra parî ma hûmara yewîne ya kovare vete.
Kovara ma ya ke bi nameyê ‘Nivîskarên Biçûk’ de vejîna heme gedeyî sanikanê xo nusenê. Tayê sanikî est ê gedeyî sey karêko kolektîf pîya nusenê. Gedeyî sanikanê xo hem nusenê hem zî kayî kenê. Peynîye de zî ma weşanenê û danê gedeyan.”
‘Ma wazenê nê xebatan hîra bikerê’
Cebar Alp ard ziwan ke emser seba humara kovare ya dîyine xebat kenê û wina vat: “Na hûmara ma ya dîyine goreyê hûmara parî tayêna hîraya. Nuştoxê emserî yê parî nîyê, ameyê vurîyayene. Ma zanê ke gedeyê ke Sûr de weşîya xo ramenê mîyanê îmkananê şenikan de cuyenê. Nuştoxê na kovare pêroyê înan gedeyê qezaya Sûrî yê. Gedeyê Sûrî sanikanê xo nusenê û înan çarnenê kayî. Heme prosesê nê kargehe nê sanikan ser o yeno ramitene.
Nika zî ma amedekarîya hûmara newîye yê kovara ‘Nivîskarên Biçûk’ kenê. Heta 12yê êlule bêro weşanayene. Nika Kargeh de nêzdîyê 50 gedeyan est ê. Kargehê taybetî yê drama û dûblajî bi hemkarîya Komeleya ‘Berî Her Tiştî Zarok û Zarok TV’yî yenê kerdene. Çi heyf ke taxanê bînan de xebatê ma çin ê. La ma wazenê ke nê xebatanê xo hîra bikerê û xo biresnê qezayanê bînan zî. Gedeyê ma yê ke cayanê bînan de cuyenê, eşkenê sanikanê xo ma de pare bikerê. Ma wazenê ke her çar parçeyanê Kurdîstanî de sanikî ma rê bêrê û ma nê karê xo bidim domnayene û na rayede vernîya gedeyan abikerime. No derheq de hêvîya ma zaf berz a. Wexto ke îmkanî bêrê dayene, gedeyî eşkenê xebat û xeyalanê xo bêsînor û bêters bîyarê ziwan ey xeylî karan bikerê.”
Şayîya kovare 12 yê êlune de yena viraştene
Cebar Alpî peynîya qiseykerdişê xo de ard ziwan ke xebatê kargehan 12 yê êlune de bi şayîyêke qedêna û vat: “Gedeyê ke nê kargehan de ca girewto, çîyê ke musayê înan bi pêşkêşîyêk nîşan bidê. Kargehê kayî kayêko taybet, kargehê zîwanê îngilîzkî de zî bi melodîya kilamê Zarok TV’yî pêşkêşîyê bêro kerdene. Kargehê dramayî zî bi kayî û dramaya ke gedeyan amade kerdê bêro pêşkêşkerdene. Peynîya nê pêşkêşîyanê kargehan da ma kovare ‘Nivîskarên Biçûk’ teslîmê gedeyan bikerê û bi kilamanê Zarok TV’yî şayîya xo biqednê. Şayîya ma 12yê êlule de awanîya Komeleya ‘Berî Her Tiştî Zarok’ ê qezaya Sûrî de bêro viraştene.”
