Cagirê Hemserekanê Pêroyî yê DEM Partî Ozturk Turkdoganî vat ke seba ke proses aver şêro ganî şertê xebata azade ya birêz Ocalanî bêrê ca û astengê verê ey bêrê wedarnayîş.
Prosesê Aştî û Komelê Demokratîkî rojeva Kurdîstan û Tirkîya de bîyo xalanê bingeyênan ra yew. Badê qebulbîyayîşê qanûnê çarçewayî yeno pawitiş ke qanûn bêro caardış; no do raporê tesbît û teyîdî yê MGK’yî ra dima bibo. Binê serekîya Cagirê Serekkomarî Cevdet Yilmazî de Heyetê Taqîb û Erjnayîşî ameyê awankerdiş. Rayberê Şarê Kurdî Abdullah Ocalan do “Koordînatorîya Aştî û Sîyasîbîyayîşî” bikero. Turkdoganî qanûnê çarçewayî û prosesî ser o Ajansê Welatî rê qisey kerd.
‘Hetêkê prosesî huqûqî yo, heto bîn zî sîyasî yo’
Ozturk Turkdoganî îfade kerd ke qanûnê çarçewayî seba prosesî destpêkêko muhîm o: “Ganî no qanûn sey qanûnêko destpêkî bêro dîyayîş. Helbet no qanûn goreyê waştişê ma nêbî la çarçewaya pêkerdişêk de ame hedrekerdiş. Mîyanê qanûnî de zî ame vatiş ke qanûn tena xo bes nêkeno û badê ci hewcedarîye bi rêzkerdişanê neweyan est a. Ganî ma nê prosesî tena prosesêk huqûqî ra girê nêdê; eynî wextî de prosesêko sîyasî yo. Badê qanûnî heyetêk ame awankerdiş; heyetî heta nika 2 kombîyayîşî kerdî. Nê kombîyayîşan de heyetê binî zî ameyî awankerdiş.”
‘Badê tesbît û teyîdî birêz Ocalan û heme kesî do bikewê mîyanê qanûnî’
Turkdoganî bale ante rol û mîsyonê Rayberê Şarê Kurdî Abdullah Ocalanî ser o: “Ma rê heyetan mîyan de heyeto tewr muhîm Heyetê Koordînasyonê Aştî û Sîyasîbîyayîşî yo; ê nê heyetî sey Heyetê Aştîye name kenê. Birêz Ocalan do sey koordînatorî no proses îdare bikero. Kêmanîya qanûnî ya tewr girde na ya ke birêz Ocalan û rayberê rêxistine qanûnî ra teber verdîyayê. Badê tesbît û teyîdî ke qanûn ame caardiş birêz Ocalan û heme kesî do dorbidor bikewê mîyanê qanûnî. Ma nê kêmanîyî muxatabanê xo rê zî vatî. La semedê ke qanûnî rê hetêko sîyasî zî est o, ma no qanûn seba nika bes dî. Badê cû ganî zaf qanûnî bêrê vetiş.”
‘Ganî şertê xebata azade ya birêz Ocalanî bêrê ca’
Turkdoganî dîyar kerd ke seba ke proses aver şêro ganî şertê xebata azade ya birêz Ocalanî bêrê ca; çike o muxatabo bingeyên yê prosesî yo: “Proses tena wina eşkeno aver şêro. Tirkîya hem zere de hem zî teber de tena bi no proses eşkena pesnê xo bido. No proses ra teber no îqtîdar mîyanê krîzî de yo. Raporê Komîsyonê Meclîsî tena bêçekbîyayîşî ser o nîyo; xala 7. de behsê demokratîkbîyayîşî keno. Îdareyê Têgêrayîşî zî eşkerayîyêk daye: Hêzê xo Tirkîya ra bi temamî antî û tehlukeyê pêkewtiş û şerî meydan ra wedarîyayî. Ez bawer kena ke nêzdî de komêk gerîla do bieşkê bêrê. Badê naye ganî MGK raporê tesbît û teyîdî eşkera bikero. Coka çîyo ke nika ganî bêro kerdiş no yo: şertê xebata azade ya birêz Ocalanî bêrê ca û astengî bêrê wedarnayîş ke bieşko koordînatorî bikero.”
‘Hewcedarîye bi destûrêk demokratîk est a’
Turkdoganî dîyar kerd ke seba gameeştişî hewcedarîye bi garantîya qanûnan est a: “Seba tatbîqkerdişê qanûnî, vejîyayîşê tepîşteyan hepisxaneyan ra û agêrayîşê gerîlayan û kesanê dîasporayî hewcedarîye bi lezabezîye est a. Tirkîya rê destûrêk demokratîk û sivîl lazim o. Heme welatan de ke prosesê çareserîye tede bîyê, destûr ame vurnayîş û destûrêk demokratîk ame awankerdiş ke heqê ziwanî û azadîya fikrî nas keno. Seba ke proses komelkî bibo, ganî fikr û ramanê birêz Ocalanî biresê komelî. Ganî rojnameger, akademîsyen û heme beşê komelî birêz Ocalanî reyde pêvînayîş bikerê.”
