Rojîn Akine dayîka xo reyde bêrîvanî kerdêne. Aye vera zulmê ke şarê kurdan ser o bîyî, rayîrê koyanê azadan girewt. Bêrîvanî caverdaye û bî endama Têgêrayîşê Azadîya Kurdîstanî.
Rojîn Akin (Sorxîn Mazlûm) 6ê tebaxa 2019î de şehîd bîye. Dayîka aye Ferînaz Akine behsê domanîya keyna xo kerd û waşt ke keyna aye rê mezelêk bibo. Ferînaz Akine wina vat: “Rojîne domanêka zaf kêfweşe bî, embazanê xo rê zî wina bî. Serkewte bî û embazîya aye zaf weş bî. Ma sey keyeyî welatperwer bî la ma qet bawer nêkerdêne ke do aye ma caverdo û şêro. Tetwan de mekteb wendêne; birayê aye hepisxane de bî, wayê aye zî unîversîte wendêne. Pîyê Rojîne tayê heywanî herînayî û ma şîyê dewe. Kêfa aye weş bîye; ma uca pîya şîyêne bêrî.”
‘Nêşîye bêrî tewrê têgêrayîşî bîye’
Ferînaz Akine behsê tewrbîyayîşê Rojîne kerd. Aye îfade kerd ke a roje Rojîn nêweş bîye coka nêşîye bêrî: “Ez werişta û şîya bêrî. Mi dî ke Rojîn zî ameya; tayê mi het ronişte û vat: ‘Dayê, ez nêweş a, ez şêra keye.’ Keye nêzdî bî; mi zî vat: ‘Temam keyna mi, şo, heta ke ez yena.’ Ma karê xo qedêna; saete 6-7 bîye, hamnan bî, dinya hema roşn bîye. Heta ke ez resaya keye, dinya tarî bîye. Mi dî ke ceyranê keyeyî padîyayeyo; ez şîyaya embazanê Rojîne het. Mi persê Rojîne kerd, înan vat ‘nêameya tîya’. O wext mi zana ke Rojîn şîya.”
‘Domanêka serkewte bî’
Ferînaz Akine dîyar kerd ke Rojîne qet behsê şîyayîşî nêkerdêne û wendişî ra zaf hes kerdêne: “Her kesî rê şîretê wendişî kerdêne. Aşma tebaxe mi rê zindan a. 3ê tebaxe roja bîyayîşê aye ya, 6ê tebaxe zî roja şehadetê aye ya. Rojîne 29ê tebaxe şîye koyan. 2016î de şîye, 3 serrî û nêm embazan mîyan de menda û 2019î de şehîd bîya. Rojîne hema doman bîye la zulm û heqaretê vera şarê kurdan dîbî.”
‘Hesreta Rojîna mi zaf gird a’
Ferînaz Akine dîyar kerd ke hêvî kena proses ser bikewo û Rayberê Şarê Kurdî Abdullah Ocalan azad bibo: “Ez wazena ke şarê kurdî bibo yew û bizano ke no veşayîş zehmet o. Ez dayîka 4 domanan a; lajê mi ceza girewto, Rojîne zî şehîd bîye. Ez dorûverê xo ewnîyena her çîyê mi est o la domanê mi çin ê. Wa kurdî bibê yew êdî bes o. Bi xêrê nê domanan ma resayê heta na sewîye. Înşelah aştî do bibo mezelê domananê ma do virazîyê ke ma bieşkê şêrê mezelanê înan ser. Mezelê Rojîna mi çin o; wa goristanê înan bibo ma zî şêrê domananê xo reyde qisey bikerê. Hesreta Rojîna mi zaf gird a.”
