Bedlîs – Serhat Orak (Bager Tetwan) 2015î de vera zulm û zorê ke şarê kurdan ser o bî, tewrê refanê Têgêrayîşê Azadîye bî û 11ê teşrîna verêna 2016î de ganê xo ra bî. Raîfe Orake serrgêra şehadetê lajê xo de helwest û kesayetê ey ser o qisey kerd û wina vat: “Bêters bî û embazanê xo rê zaf nerm bî. Zulm û zor qebul nêkerdêne.”
Şarê kurdan têkoşînê estbîyayîş û azadîye de bedelê giranî dayî û vera qirkerdiş û înkarî xoverdayîşêko tarîxî ramit. Kesan ra yew ke nê têkoşînî de heta peynî xo ver da, Serhat Orak (Bager Tetwan) o. Serhatî domanîye de Têgêrayîşê Azadîye nas kerd, bi zehmetîyan pîl bî û kewt mîyanê xebatan.
‘Embazanê xo rê zaf nerm bî’
Serhat domanîye de zaf zîrek bî û vera rewşanê zehmetan bêters bî; neheqî û zor qebul nêkerdêne. Raîfe Orake behsê taybetîyanê lajê xo kerd û vat: “Merdimêko zaf rind bî û embazanê xo rê zaf erj dayêne. Hêrsin bî la embazanê xo rê zaf nerm bî.” Raîfe Orake her averşîyayîş û zanayîşê xo lajê xo reyde pare kerdêne û ey reyde sey embazî qisey kerdêne. Coka Serhat goreyê emrê xo hîna pîl fikirîyêne. Serhat heta 27 serreyî keye de mend, tewrê xebatan bî û 27 serreyî de tewrê rêzanê Têgêrayîşê Azadîye bî.
‘Ez nê zulmî qebul nêkena’
Serhat Orakî verê ke tewrê refanê Têgêrayîşê Azadîye bibo, dayîka xo reyde munaqeşe kerd. Dayîke ey rê vat: ‘Mi ti bi zehmetîyanê girdan ardî nê emrî.’ Serhatî zî wina cewab da: “Panc domanê to est ê; wa yew înan ra seba nê rayîrî bo, o yew zî ez a. Wa çar domanê to to rê bimanê.” Wexto ke hêsirî çimanê dayîke ra rijîyêne, Serhatî vat: “Dayê, ti bibermî yan nêbermî, ez nê zulm û heqaretî qebul nêkena.”
‘Mi hîs kerd ke lajê mi rê çîyêk bîyo’
Serhat Orak 2015î de tewrê Têgêrayîşê Azadîye bî û 11ê teşrîna verêna 2016î de ganê xo ra bî. Raîfe Orake sey heme dayîkanê gerîlayan averşîyayîşê waranê şerî taqîb kerdêne; çike 2016î de dewleta tirke vera Têgêrayîşê Azadîye û şarê kurdan planê ‘çok ronayîşî’ ardbî ca. Raîfe Orake televîzyon ra eşnawit ke dewa Oranis de 5 gerîlayî şehîd bîyî: “Ma zanayêne ke Serhat nê cayan de yo. Mi vat: ‘Nika dayîkê înan senî bêkeyf ê; heme zî domanê ma yê.’ Badê cû zerrîya mi de tersêk virazîya: nêbo ke Serhat zî înan mîyan de bo. Keyeyî persê ey kerd û ma rê vatêne ke şehîd nêbîyo; tena seba ke ez meraq nêkera wina vatêne.” Raîfe Orake heşt rojî badê şehadetî xebere eşnawite. Cenazeyê Serhatî ardbî Wan; keye û merdimî amê têhet û şîyê Wan. Raîfe Orake wina vat: “Ma cenaze girewte, şute, berde Kotom û uca şîna ey ronaye.”
‘Eke ê yew game bierzê, ma do di gaman bierzê’
Raîfe Orake bi derdo giran ke zerrîya aye de yo, vengdayîşê vindarnayîşê şerî kerd û qiseykerdişê xo wina qedêna: “Ma venga heme dayîkanê gerîlayan û dayîkanê leşkeran danê. Ma êdî nêwazenê ke dayîkî zerrîveşaye bê. Eke ê seba aştîye yew game bierzê, ma do di gaman bierzê. Ma êdî nêwazenê ke domanê ma şehîd bibê; ma wazenê ke berê hepisxaneyan abê. Ma aştîye wazenê, şer nêwazenê. Ma zî bedelê girdî dayî; ma êdî nêeşkenê nê derdê girdî hilgêrê.”
