Îstanbul – Velîde Arvas (Dîcle Ela) 2017 de di embazanê xo reyde kewte şer. Seba ke bi ganî nêkewo destê leşkeran, aye bombeya ser xo teqnaye û ganê xo ra bîye. Pîyê û dayîka Velîde Arvase keyna xo ser o wina vat: “Şîyayîşê koyî waştişê aye bî; aye waştişê xo dima şîye.”
Velîde Arvas 1990 de dewêka qezaya Tetwan ya Bedlîsî de sey domana tewr qije ya keyeyî ameya dinya. Keyeyî waştêne ke nameyê aye bikero Welat la semedê ke nameyê kurdkî qedexe bîyî, îdareyê nufûsî no name qebul nêkerd; coka keyeyî nameyê aye kerd Velîde. Keyeyê Arvasan semedê tedaya sîyasî 1995 de mecbur mend û bar kerd Îstanbul. Velîde Arvase Îstanbul de dest bi mektebî kerd la semedê rewşa ekonomîke û nêrazîbîyayîşê xo yê vera sîstemê perwerdeyî mekteb caverda û dest bi karî kerd.
Birayê aye Fikret Arvas semedê ke tewrê çalakîyêk bîbî ame destbendkerdene û 7 serrî hepisxane de mend. Nê kerdişanê dewlete Velîde Arvase ser o tesîrêko negatîf kerd. Aye 2012 de tewrê Têgêrayîşê Azadîye bîye û koyan de nameyê Dîcle Ela girewt; 2014 de zî Şingal de vera hêrişanê DAÎŞ’î şer kerd. Velîde Arvas û embazê aye Berfîn Taşli (Sarîna Amed) û Mustafa Guneş (Hebûn Amed) 26ê teşrîna verêne 2017 de herêma Dorşînî ya qezaya Pasûrî ya Amedî de leşkeranê artêşa tirke reyde kewtî şer. Înan heta fîşeka peyêne şer kerd û seba ke bi ganî nêkewê destê leşkeran, bombeyê ser xo teqnayî û ganê xo ra bîyî.
Dayîka Velîde Arvase Muzeyyen Arvase vat ke Velîde domana aye ya tewr qije bîye: “Velîde domanêka zîrek bîye. Waştêne biwano la dima mekteb caverda û dest bi karî kerd. Rojêk verê ke şêro kar, aye vat ‘ez şona nêweşxane’; şîye û hendî nêameye. Mi zî vat ‘Rayîrê to xêr bo.’ Lajê mi Fikret zî mîyanê xebatan de bî û 7 serrî girewte mend. Têkoşînê azadîye domanê mi ser o tesîr kerd. Şîyayîşê koyî waştişê aye bî; aye waştişê xo dima şîye.”
Pîyê Velîde Arvase Îhsan Arvasî zî dîyar kerd ke semedê ke dewa înan ameye veşnayene, mecbur mendî û bar kerd Îstanbul: “Domanêka zaf delale bîye; ma aye ra zaf hes kerdêne. Îstanbul de seba debara keyeyî xebitîyêne. Badê 5 serranê koyî 2017 de Amed de şehîd bîye û ma aye dewa xo de defin kerde. Ma bi derdê xo serberz ê.”
