Mamostayê KURDÎGEH’î Şevket Acarî dîyar kerd ke dewreyo newe yê perwerdeyê kurdkî hewteyêk ra pey do dest pêbikero. Goreyê ey, mîyanê serre de zî şarê bajarî eşkeno muracaetê komele bikero.
Komeleya Averberdişê Kultur û Ziwanê Kurdkî (KURDÎGEH) nêzdîyê 3 serran o ke Wan de sey komeleyêk ziwan, kultur û hunerî xebitîyena. Komele zêdeyêr lehçeyanê kurdkî ser o, sewîyeya destpêkî ra heta sewîyeya mamostayîye, wendekaran rê perwerde dana. Her serre mîyanê 250 û 500 kesî nê sinifan ra mezun benê. Muracatê perwerdeyê atolyeyanê ziwanî aşma êlule de dest pêkerd. Şevket Acarî derheqê xebatanê komele Ajansê Welatî rê qisey kerd.
‘Ma xebata averberdişê kurdkî kenê’
Şevket Acarî dîyar kerd ke komele sey dewamê komeleyanê ziwanî yê sey KURDÎ-DER’î xebitîyena. Goreyê ey, perwerdeyê ziwanî ra teber bi panel, çalakî û programan zaf xebatan kenê. Acarî wina vat: “Ma tim vera sîyasetê asîmîlasyonî yê ser kurdkî nêrazîbîyayîşê xo anê ziwan. KURDÎGEH de ê kesan rê ke qet kurdkî nêzanê ra bigîre heta sewîyeya mamostayîye sinifê ma est ê. Perwerde zêdeyêr bi lehçeya kirdaskî yeno dayîş. Semedê ke bajarê Wanî de kesê ke bi kirmanckî/zazakî qisey kenê kêm ê, perwerde zêdeyêr bi kirdaskî yo. Eke waştiş bibo, ma hazir ê ke perwerdeyê kirmanckî/zazakî zî bidê.”
‘Seba domanan sinifê taybetî û perwerdeyê online do bêrê akerdiş’
Acarî îfade kerd ke seba domanan sinifê taybetî û seba kesan ke nêeşkenê bêrê komele perwerdeyê online do a bikerê: “Ma zî goreyê prosesê newe wazenê xebatanê xo de perspektîfêko newe aver berê. Xebatê ma yê perwerdeyî aşma êlule de dest pêkerd û do heta peynîya aşma gulane dewam bikerê. Naye ra dima ma do hem hetê mufredat û programan ra hem zî hetê teknîkî ra perwerdeyanê xo xurt bikerê. Hamnan de zî taybetî seba domanan do sinifî bêrê akerdiş.”
‘Kam wext ke biwazê, eşkenê muracatê KURDÎGEH’î bikerê’
Acarî dîyar kerd ke seba dewreyê newe 6 sinifî hazir ê: “Ma do hewteyo ke yeno dest bi perwerdeyî bikerê. Her serre mîyanê 250 û 500 wendekarî komele ra mezun benê. Eke ma firsendanê zêdeyêran bivînê û xebatanê xo aver berê, na hûmare do bireso hezar kesan. Çike bajarê Wanî de potansîyelo winasî est o. Zaf kesê ke hewcedarîya înan bi perwerdeyê kurdkî est a, nêeşkenê biresê dezgehanê ma. Coka ganî KURDÎGEH her warî de bêro daşinasnayîş.” Acarî vat ke seba sewîyeya destpêkî û sewîyeya verêne mîyanê serre de zî muracatî yenê qebulkerdiş û goreyê hewcedarîye sinifê neweyî yenê akerdiş. Ey peynî de venga heme kurdan da ke seba averberdiş û pawitişê ziwanê xo tewrê xebatan bibê.
