Ziwannas Zana Farqînîyî reaksîyon da hedefgirewtişê tabelayanê kurdkî û vat: “No xora heqêko destkewte yê nê şarî yo. No ne waştişêko însanî yo, ne zî demokratîk o. Ê kesê ke vanê ‘ma wa û birayê yewbînan ê’, ganî hurmetê heqê wayûbirayîye bikerê.”
Tabelayê îstîqametî yê bi kurdkî û tirkî yê Amedî û vurîyayîşo ke Wezaretê Perwerdeyê Neteweyî programê dersa weçînayîşî ya kirmanckî de kerdo, bi girêdayîşê prosesê neweyî yê çareserîye bîyî babeta munaqeşe. Rojnameyê Sozcuyî tabelayê diziwanî yê Amedî bi sernuşteyê “Netîceyê şênberî yê prosesî, tabelayê kurdkî yê” weşanayî û wekîla ÎYÎ Partî Ayyuce Turkeş Taşe zî medyaya sosyale de ziwanê xo derg kerd; la nê tabelayê ke 2014î ra nat est ê, seke newe ameyî amadekerdene, ameyî mojnayene.
Farqînîyî vat ke heqê şarê kurdan sey heqê her şarî est o û ziwan nê heqan ra yew o: “Wexto ke behsê prosesê haştîye beno, kesê xêrnewazî ke wazenê komelî bidê verê yewbînan, bi vindertişanê xo yê faşîst, înkarker û qedexeker nêwazenê proses aver şêro. Na mesele ya ewroyî nîya; wexto ke Tirkîya waştêne bikewo Yewîtîya Ewropa, nameyê dewan bi di ziwanan ameyî nuştene. 10 serrî ra zêdeyêr o nê nuşteyî cayê xo de yê, wexto ke qeyûmî ameyî şaredarîye zî kesî dest nêda ci. Eke rasta zî samîmî bîyêne, eynî çî Almanya ra û seba tirkmenan Sûrîye ra wazenê; çira wexto ke kurdî heqê xo yê xespkerdeyî gênê xo dest, benê dişmen? Sebeb eşkera yo: bêtehamulîya vera kurdan. Demê asîmîlasyon, red û înkarî qedîyayo. Ganî Tirkîya de fehmê monîzmî bêro verdayene û komelêko demokratîk esas bêro girewtene ke zafhetîya komelî gêno çiman ver,.”
Farqînîyî bale ante vateyanê Serokkomar Erdoganî yê “Ma peynîya red û înkarî ard” ser o: “Eke rasta zî peynîya red û înkarî ameya, ganî verê heme heq wayîrê ci rê bêro agêrnayene; yewê nînan heqê perwerdeyê bi ziwanê dayik o. Nêweşxaneyanê na dewlete de tayê cayan de bi zaf ziwanan xizmet yeno dayene, la kurdkî tede çin a; xutbeyanê Dîyanetî de kurdkî hema çin a. Vanê kurdî zî sey tirkan awankerdoxê eslî yê na komar ê; eke wina yo, çira na komare de wayîrê heqan nîyê?”
Ey peynî de vat ke dewletê bînî zî est ê ke çend ziwanê fermî tede est ê û parçe nêbîyî: “Wexto ke heq yeno înkarkerdene, merdim seba destkewtişê heqê xo rayîranê meşrû û demokratîkan ra şino. Kurdî nêeşkenê bi ziwanê xo qisey bikerê, tabela binusê, xizmet bigîrê, perwerde bivînê; eke nê problemî dewam bikerê, nisbetê qiseykerdişê bi kurdkî hîna kêmî beno û gedeyî ziwanê xo ra dûrî kewenê.”
