Meclîsê Keyeyanê Şehîdan ê Qamişlo, Dêrik, Amûdê, Tirbespîyê, Çilaxa, Hesekê û Dirbêsîyî, bi eşkerayîyêke qerarê Wezaretê Perwerdeyî yê têkîldarî ziwanê kurdkî ra red kerd û waşt ke ziwanê kurdkî bibo ziwanêko fermî.
Meclîsê Keyeyanê Şehîdan şaristananê Qamişlo, Amûdê, Dêrik, Çilaxa û Tirbespîyî de, derheqê qerarê Wezaretê Perwerde û Musnayîşê yê hukmatê demkî yê Sûrîye yo ke 27ê tebaxe de seba dayîşê tena 3 dersanê ziwanê kurdkî hewteyêk de, eşkerayîyêke da.
QAMIŞLO
Qamişlo de eşkerayîye verê awanîya Meclîsê Keyeyanê Şehîdan de, hetê endamanê meclîsî ra, bi ziwanê kurdkî hetê Zozan Sarîkî ra û bi ziwanê erebkî hetê Şêrzad Remo ra ame wendene.
DÊRIK
Dêrik de eşkerayîye verê çadirê çalakîye ya ke hetê Însîyatîfa Şarî ra verê Wendegeha Yûsif El Ezme de ameya akerdene, hetê wendekara bi nameyê Renda Hacî ra ame wendene.
AMÛDÊ
Amûde de eşkerayîye verê awanîya Meclîsê Keyeyanê Şehîdan, hetê endamanê meclîsî ra bi ziwanê kurdkî Cîlan Yûsifî û bi ziwanê erebkî hetê Ebdulqadir Şêxmûsî ra ame wendene.
TIRBESPIYÊ
Tirbespî de eşkerayîye verê awanîya Meclîsê Keyeyanê Şehîdan hetê wendekarê bi nameyê Nejbîr Îsmaîlî ra ame wendene.
ÇILAXA
Çilaxa de eşkerayîye verê merkezê Meclîsê Keyeyanê Şehîdan ê Resafî, hetê endamanê meclîsî ra bi ziwanê kurdkî Ahîn Şwêşî û bi ziwanê erebkî Ferîda El Seîdî ra ame wendene.
HESEKÊ
Hesekê de eşkerayîye verê awanîya Meclîsê Keyeyanê Şehîdan hetê endama meclîsî Guljîn Ehmî ra ame wendene.
DIRBÊSIYÊ
Dirbêsî de eşkerayîye hetê endamanê Meclîsê Keyeyanê Şehîdan ra, bi ziwanê kurdkî hetê Îbrahîm Hesenî ra û bi ziwanê erebkî hetê Dîlber Mihemedî ra ame wendene.
Muhtewaya eşkerayîye cêr de ya:
“Qonaxêka sey nê tarîxî û çarenusî de, ganî îradeya hempar ê nasnayîşê nasnameyan bibo bingeya paşeroja welatî, ma sey Meclîsê Keyeyanê Şehîdan bi qerarê Wezaretê Perwerdeyî yê hukmatê demkî ra rî bi rî manenê. No qeraro ke wazeno ziwanê kurdkî mîyanê sînorê çend saetanê sembolîk de bifetisno, na game mîrasê û domnayîşê eynî hişmendîya yewperest û asîmîlasyonî yo.
Gonîya pîroz ê kênek û lajekanê ma yê ke vera tarîye bedenê xo kerd mertal, seba 3 saetan nêame rijnayene ke ewro ziwan û hebûnê ma bibo babeta tawîz û sîyasetê dûrkerdişî. Ziwanê kurdkî tena wasitayê komînîkasyonî nîyo; ziwan bingeyê estbîyayîşê ma, nasnameyê şarê ma û reseniya tarîxa ma yo.
Nê bingeyê ser o, ma nê xalan eşkera kenê:
- Redkerdena qerarê şovenîst: Ma qerarê kêmkerdena dersanê ziwanê kurdkî bi tundî red kenê û na gama kanperestî sey binpaykerdişêka raşterast ê Peymana 29ê çeleyî û estbîyayîşê şarê kurdî erjnenê.
- Mecburkerdena perwerdeya bi ziwanê dayike: Ma wazenê ke ziwanê kurdkî bibo ziwanê fermî û yê perwerdeyî seba heme lîseyan û astanê wendişî herême de, tede ziwanê erebkî.
- Zoreberdena sîyasetê vurnayîşê demografîk: Her hewldayîşêk seba vurnayîşê namanê kurdkî yê herêman yan zî visnayîşê têkîlîya gedeyanê ma ziwanê înan ê dayikî ra, tehlukeyêko gird o aşîtîya komelkî û way û birayîya şaran ser o.
Ma sey keyeyanê şehîdan tekrar kenê ke ziwanê ma estbîyayîşê ma yo, ma do şopa şehîdanê xo ser o bê û vera her tewir sîyasetê înkarî de, têkoşînê xo ya heqdar û demokratîk heta serkewtenî xurt bikerê.
