Tirkîya û Kurdîstan de 14ê êlule de serra perwerdeyî ya 2026-2027î dest pêkena û bi mîlyonan gedeyî dest bi dersan kenê; mîyanê înan de bi mîlyonan gedeyê kurdan zî est ê, la ê nêeşkenê bi ziwanê xo perwerde bivînê.
Kurdkî mekteban de tena sey dersa weçînayîşî hewte de 2 saetî yena dîyene û seba akerdişê derse ganî tewr kêmî 10 wendekarî aye biweçînê.
Hemserekê Zimanxaneyî Aslan Demîrî ajansê ma rê vat ke gedeyê kurdan hema zî bi ziwanê xo perwerde nêvînenê û bi ziwanêko xerîb yenê asîmîlekerdene: “Ma wazenê gedeyê ma bi ziwanê dayike perwerde bivînê. No waştiş seba heme gedeyan o; kesê ke ziwanê dayike yê înan tirkî nîyo, ganî bi ziwanê xo perwerde bivînê.”
Demîrî ard ziwan ke ewro prosesê çareserîye est o û no seba herkesî muhîm o: “PKKyî çek rona û bi vengdayîşê Rayberê Şarê Kurdî Abdullah Ocalanî xo fesih kerd. La asîmîlasyonê vera ziwanê kurdkî hema zî dewam keno. Heta ke kurdkî nêbo ziwanê perwerdeyî, tu manaya çareserîye nêmanena. Dezgehê ziwanê kurdkî seba perwerdeyî bes nîyê; eke perwerdeyêko pêroyî çin bo, nêyeno qebulkerdene. Nê welatî de kurdkî qedexe bîye, înanê ke kurdkî qisey kerdêne ameyêne tepiştene û şar ewro hema zî terseno. Dewlete behsê wayûbirayîya kurd û tirkan kena, la êdî tena vate bes nîyo; ganî dewlete gamanê şênberan bierzo, kurdkî mekteban de bêro wendene û qedexeyê vera kurdkî bêrê wedarnayene. Wa êdî her ca de kurdkî bêro qiseykerdene.”
Demîrî peynî de vat ke ê sey Zimanxane û dezgehanê ziwanî 14ê êlule de Îstanbul de seba kurdkî çalakîyan virazenê: “Ma do bi rayîrşîyayîşêk û eşkerayîyêke perwerdeyê kurdkî biwazê. Ma sey Zimanxaneyî pêşnîyaz zî kenê ke seba perwerdeyê bi kurdkî ma şêrê Ankara. Ma venga şarê xo danê ke bêrê seba ziwanê kurdkî mîyanê ma de ca bigîrê. 14ê aşme de ma meydanan ra yê.”
