Mazlum Ebdî ke cewab dayê persanê rojnameyê Yenî Yaşamî, dîyar kerd ke badê 15 serranê şerî û bedêlanê giranan, amancê înan o esasî pawitişê destkewteyan o û wina vat: “Eke Sûrîye newe ra bêro awankerdene, ganî kurd nê awankerdişî de bi nasnameya xo ca bigêrê û heqanê xo garantî bikerê.”
Derheqê raverşîyayîşanê Sûrîye de, Mazlum Ebdî seba rojnameya Yenî Yaşamî cewab da persanê Nezahat Dogane. Mazlum Ebdî bale ante raverşîyayîşanê Rojhelatê Mîyanênî ser o û îfade kerd ke prosesê awankerdena Sûrîye ya newe de, ganî şarê kurdî warê sîyasî û îdareyî de cayê xo yê heqdarî bigêro. Mazlum Ebdî dîyar kerd ke badê 15 serranê şerî û bedêlanê giranan, amancê înan o esasî pawitişê destkewteyan o û wina vat: “Eke Sûrîye newe ra bêro awankerdene, ganî kurd nê awankerdişî de bi nasnameya xo ca bigêrê û heqanê xo garantî bikerê.”
‘QSD tesfîye nêbî, bîyo beşêko fermî yê artêşê Sûrîye’
Muneqeşeyê derheqê entegrasyonê Hêzanê Sûrîya Demokratîk (QSD) de, Ebdî îdiayê sey “QSD tesfîye bîyo” yan zî “çîyêk nêvurîyayo” red kerd. Mazlum Ebdî dîyar kerd ke no proses bingeyê mutabeqet û planêko zelal ser o ca ameyo û wina qiseykerd: “Hêzê ma ke 15 serrî pawitişê na herre kerd, nika bi hawayêko fermî tewrê artêşa Sûrîye bîyo. Amancê ma no yo ke pawitişê herême û şarê xo çarçewayêka newe û fermî de dewam bikerê.”
‘Problemê ziwanê dayîke xeta ma ya sûr a û tekoşînê ma do dewam bikero’
Babeta perwerdeyî ya bi ziwanê kurdkî de, Mazlum Ebdî dîyar kerd ke tarîxê Sûrîye de raya yewina ke ziwanê kurdkî perwerdeyî de bi hawayêko fermî ca gêno. Ebdî kifş kerd ke na game ke ameya eştene ma rê bese nêkeno û wina domna: “Ziwanê kurdkî xeta ma ya sûr a. Rixmê statuya ziwanî ame qebulkerdene zî, goreyê sîstemê ke ma nê 15 serranê peyênan de awan kerdibî hîna kêmasî est a. Seba heqanê kulturî û perwerdeya ziwanê dayîke, têkoşînê ma do bi qerardarî dewam keno.”
‘Seba Efrînî û Serêkanî xebatê yenê rayraberdene’
Mazlum Ebdî bale ante rewşa herêmanê sey Efrîn û Serêkanî ser û dîyar kerd ke seba agêrayîşê ewle yê koçberan û çareserkerdena prpblemanê ewlekarîye, xebatê înan dewam kenê. Mazlum Ebdî dîyar kerd ke seba pawitişê heqanê şarê kurdî heme herêman de, ê bi rayedaranê Sûrîye rê mîyanê diyalogî de yê û amancê înan no yo ke ewlekarî û aramî seba pêro şaran bêro garantîkerdene.
‘Tirkîya reyde têkîlî û proseso newe goreyê menfetê şaran o’
Derheqê têkîlîyanê bi Tirkîya û tesîrê aye ya herême ser o de, Mazlum Ebdî dîya kerd ke badê serranê şerî, nika zemînêko seba diyalog û çareserîye vejîya meydan. Ebdî îfade kerd ke ê muhîmîye danê têkîlîyanê asayî û viraştoxî yê bi Tirkîya rê û wina vat: “Têkîlîyê ke bêşer û bingeyê diyalogî ser o bêrê rayraberdene, do hem seba Sûrîye hem zî seba şarê kurdî netîceyanê pozîtîfan xo reyde bîyarê.”
‘Ganî kurdî yewîya xo awan bikerê û bi bawerî ver bi ameyoxê rê rayra şêrê’
Mazlum Ebdî peynîya qiseykerdiş xo de vengdayîşê yewîya pêroyî hêzanê sîyasî û şarê kurdî kerd û bale ante muhîmîya hêzdarkerdena têkoşînê demokratîk ser. Mazlum Ebdî vat ke êdî rîpelê şerî ame girewtene û wext wextê awankerdişî yo û vat: “Ganî şarê ma û pêroyî şarê Sûrîye bi hêvîyêka girdêr biewnîyo ameyoxî rê. Bi yewîye, rêxistinbîyayîş û têkoşînêko hempar, ma bieşkê ameyoxêko azad û demokratîk awan bikerê.”
