5ê teşrîna verêne ra nat endama Sendîkaya Karkeranê Azadan ya Îranî Nahîd Xadaco ra tu xeber nêyena girewtene. Keyeyê aye fikirîyeno ke ameya girewtene; berpirsîyaranê sendîka zî eşkerayî waşte.
Nahîd Xadaco verê cû Îran de semedê çalakîyanê xo yê heqanê karkeran ameybî girewtene; 5ê teşrîna verêne ra nat vîndî ya. Wexto ke keyeyê aye şî banê aye, çîyê aye yê vilabîyayeyî û werdo ke kesî dest nêdabî, dî.
Sendîkaya Karkeranê Azadan ya Îranî seba îhtîmalê girewtişê Nahîd Xadaco endîşeyê xo ardî ziwan û waşt ke aqûbeta aye zelal bibo. Berpirsîyaran hema seba sebebê girewtişê Nahîd Xadaco û cayê ke tede yena tepiştene eşkerayîyêka fermî nêdaya.
‘Verê cû zî ameybî girewtene’
Nahîd Xadaco 1ê gulana 2019î de verê Parlamentoyê Îranî de seba Roja Karkeranê Dinya çalakîyêk karkeran ke ameybî viraştene ame girewtiş. Dima aye rê şeş serrî cezaya hepisî û 74 qamçîyî ameyî birnayene. Nahîd Xadaco seba ke cezaya xo biqedêno adara 2024î de reyna ame girewtene û 16ê êlula 2025î de Hepisxaneyê Karçak yê Veramînî ra ame veradayene.
Vîndîbîyayîşê Nahîd Xadaco, nêzdîyê serrêk badê veradayîşê aye, endîşeyê emnîyetê pawitoxanê xoseran ê heqanê karkeran reyna zêde kerdî. Sendîkaya Karkeranê Azadan ya Îranî na nêzelalî mehkum kerde û waşt ke tavilî cayê Nahîd Xadaco bêro eşkerakerdene.
