Ame eşkerakerdene ke di hewteyo peyên de, rejîmê Îranî, tewr tay 28 kesî îdam kerdî, 99 welatijî ameyê destbendkerdene û wendekaran û çalakîkeranê karkeran ser o zî tedayî zêdeyêr kerdê.
Rêxistinê Heqê Merdiman ya Îranî derheqê teda û binpaykerdişanê rejîmê Îranî yê hewteyo verên de, agahî vila kerdî.
Goreyê agahîyanê ke ameyê vilakerdene, hewteyo verên de tewr tay 28 cezayê îdamî hetê rejîmê Îranî ra ameyê caardene. 58 welatijî yê şaristananê Mehabad, Şino, Pîranşar, Nexede û Derşarî ra ameyê destbendkerdene û cezayê neweyê înan rê dayene.
Ame dîyarkerdene ke 30 welatijê bînî zî wîlayetê Fars de, bi îdiaya ke tewrê çalakîyanê peyênan bîyî de ameyê destbendkerdene.
Sewbîna ame dîyarkerdene ke tewr tayê 11 welatijê Behayî yê wîlayetanê cîyayan ra ameyê destbendkerdene û hepîsxaneyê rî ameyê erşawitene.
Ame îfadekerdene ke caardena cezaya îdamî ya Mecîd Adîne ya Kerecî de û dayena cezayê îdamî seba di ciwananê bîn yê bi namê Emîrmihemed Micelel Çûberî û Hisên Nezerî ameyê qeydkerdene. Sewbîna dosyaya Leyla Hesenî, ke cezaya îdamî aye rê ame dayene, seba Mehkemaya Berz ya Îranî rê ame erşawitene. 28 dardekerdişê ke ameyê caardene hepîsxaneyê Qizilhesar, Zahîdan, Şîraz, Reşt, Xoremabad, Tewrêz, Îsfahan û Yezdî de virazîyayî.
Goreyê ke raporê Rêxistinê Heqê Merdiman ya Îranî de ameyê dîyar kerdene ke astê komelkî û akademîkî de, zextî dewam kerdê û şeş wendekarê Unîversîteya Şerîfî û wendekarêko Behayî Unîversîteya Bîrcendî ra ameyê eştiş. Sewbîna zêdeyêrî 40 kombîyayîşê nerazîbîyayene yê teqawutan û karkeran şaristananê cîyayan de virazîyayî û nêzdîyê 305 karkerî kargehanê Borûcerd û Mahşehrî ra ameyê eştiş yan zî têrî bêkarî û nediyarîya ameyoxê karê xo mendê.
