Neteweyanê Yewbîyayeyan (NY) dîyar kerd ke serê serre ra Îran de 12 kolberê kurdî û 13 esnafê belûcî ameyê kiştiş. Sewbîna va ke ganî Îran tezmînata zîyanan bido keyeyan û cigêrayîşêko xoser derheqê nê heme hedîseyanê kiştişî de bêro kerdiş.
Çar temsîlkaranê taybet ê Neteweyanê Yewbîyayeyan (NY) derheqê kiştişê kolberê kurdan û esnafanê belûcîyan ê ke hetê rejîmê Îranî ra ameyê kiştiş, eşkerayîyêk vila kerd.
Eşkerayîye de ame dîyarkerdiş ke serê serra 2026î ra nat tewr tayê 12 kolberê kurdan û 13 esnafanê belûcîyan, netîceya gulebarankerdişê hêzanê çekdar ê Supaya Pasdaranî ya Îranî de, cuya xo ra bîyê.
Eşkerayîye de ame vatiş ke rejîmê Îranî tu agahîyêka fermî nê hedîseyanê kiştişî ser o vila nêkerd, qeydkerdiş û belgekerdişê nê hedîseyan keweno milê keyeyanê qurbanan û rêxistinanê komela sîvîl ser. Sewbîna ame vatiş ke ganî firsendê zanayîşê heqîqetî, cewabdayîş û tezmînata zîyanan bi keyeyan bêro dayîş. Sewbîna ame waştiş ke nê hedîse bi hawayêko xoser bêrê cigêrayîş.
Dewama eşkerayîye de ame dîyarkerdiş ke kolberê kurdan û esnafanê belûcîyan sinifa tewr zêde ya ke ameyê peygoşkerdiş. Ame vatiş ke seba nêbîyayîşê firsendanê karî ra, seba debara cuyayîşî mecburî sînoran ser o karê çî-mîyan û sotemenîye kenê, baca na feqîrîye zî bi canê xo danê.
