Tepişteyo nêweş Abdulvahap Adsoyo ke 30 serrî zîndan de mend û serra 2024î de ame verdayene, cuya xo kerd vîndî. Ame zanayene ke do cenazaya Adsoyî qezaya Qoserî de bêra definkerdene.
Adsoyo ke 28ê nîsana 2024î de Zîndanê Bandirma ra ame verdayene, hema zîndan de bi qanserê kewtbî. Adsoy nêweşxaneyêkê Qoserî yê Mêrdînî de cuya xo kerd vîndî û do Goristanê Hecî Hasan Adsoyî de bêro definkerdene.
Abdulvahap Adsoyo ke serra 1993yî de Qoser de amebi destbendkerdene, cezaya muebede dîyabî ci.
Adsoyî wextê verdayîşê xo de vatbî: “Mi sozêk da û seba caardena nê sozî ez do biciwîya. Mi 30 serrê xo derbaz kerdî, labelê rûhê mi hertim şima reyde bî. Heta peynîya cuya xo ez do têkoşîn bikera. Ma hêzê xo şarê xo ra gênê.”





