Êlih – Hemserekeya DBP’yî ya Êlihî Celîle Yildize û Hemserekê DEM Partî yê Farqînî Mahsum Karakoçî derheqê Prosesê Aştîye û Komelê Demokratîkî de qisey kerd. Înan ard ziwan ke dewlete bi nêzdîbîyayîşanê xo yê erey vistişê gaman komel de bêbawerîyêka pîle virazena.
Bi vengdayîşê Rayberê Şarê Kurdî Abdullah Ocalanî Prosesê Aştî û Komelê Demokratîkî dest pêkerd û nêzdîyê di serran o ke dewam keno. Her çiqas hetê Têgêrayîşê Azadîye ra hetanî nika zaf gamê şênberî ameyê eştiş zî gamê ke hetê dewlete ra yenê eştiş yan qels ê yan zî erey manenê. No hal averşîyayîşê prosesî ser o tesîr keno û komel de beno sebebê bêbawerîye.
Hemserekeya Partîya Herêmanê Demokratîkan (DBP) ya Êlihî Celîle Yildize û Hemserekê Partîya Seyyewbînîye û Demokrasîya Şaran (DEM Partî) yê Farqînî Mahsum Karakoçî derheqê prosesî de qisey kerd.
Celîle Yildize dîyar kerd ke her çiqas hetê Rayberê Şarê Kurdî Abdullah Ocalanî û Têgêrayîşê Azadîye ra zaf gamî ameyê eştiş zî dewlete gamêko winasî şênber nêeşto. Aye wina va: “Lazim o ke verê cû azadîya fîzîkî ya Rayberê Şarê Kurdî bêro ca. No waştişê şarê kurdî yo. Wexto ke na game bêro eştiş, hepisxaneyî zî do veng bibê. Înfazê embazanê ma yê ke 32-33 serrî hepisxaneyan de mendê, yenê veşnayîş. No çî nêyeno qebulkerdiş, çunke mîyanê înan de embazê ma yê nêweşî zaf ê. Nika bêvengîyêk esta. Na bêvengîye xo reyde bêbawerîye ana. Wexto ke Serek azad nêbo, nêro û sîyaset nêkero, no problemêko pîl o. Hetanî nika çi gamê ke lazim bîyê, Serekî eştê û dayê eştiş. Nika prosesî de vindertişêk est o. Ganî verê her çîyî şar wayîrvejîyayîşê Rayberîye hîna xurt bikero. Eke destê kurdan xurt nêbo, dewlete do gaman nêerza. Destpêk ra heta nika Serekî seba şexsîyetê xo tu çî nêwaşto. O her tim seba şaran aştîye wazeno. Dewlete bi nê nêzdîbîyayîşanê xo komel de bêbawerîyêka pîle virazena.”
‘Dewlete bi hawayêko cidî nêzdîya prosesî nêbena’
Mahsum Karakoçî zî da zanayîş ke dewlete bi zerreyê xo prosesî ra nêzdî nêbena. Ey wina va: “200 serrî yo ke dewletanê neteweperestan waşt têkilîyanê kurd û tirkan ê hezar serran biqedênê. 50 serrî yo ke xoverdayîşêko bêmesal dewam keno. Naye mojna ke êdî no hal do bi prosesêkê aştîye biqedîyo. Badê hende serran prosesêk dest pêkerd. Hem zî tayê madeyî Meclîsî de ameyî tesdîqkerdiş. La hema tayê çîyî qanûnanê ke ameyê vetiş ra yenê erey vistiş û nêkewenê felîyet. Şar bi Serekî bawer o ke proses dest pêkerdo. Wexto ke ma meydanan de gêrenê, şar ma rê vano: ‘Ma hetê dewlete ra tu gamî nêvînenê û ma tersenê ke no zî sey prosesê serra 2013î bibo.’”
‘Ganî dewlete samîmîyetêk bimojno’
Mahsum Karakoçî dewamê qiseykerdişê xo de îfade kerd ke hepisxaneyan de girewteyê nêweşî her roje merdene reyde ribirî yenê verdayîş. Ey qiseykerdişê xo wina dewam kerd: “La heyf ke herçiqas prosesêk est o zî nê çîyî ca nêyenê. Ganî dewlete hetê prosesî ra samîmîyetêk bimojno. Wexto ke qalê prosesî bêro kerdiş la proses nêbêro kerdiş, o proses hewa de maneno. Rixmê hende çîyan zî ziwanê dewlete nêvurîyayo. Heqê ziwanî heqêko merdimî yo dinyayî yo. Wexto ke no heq temamî sey çinî bêro hesabkerdiş, manaya prosesî zî nêmanena. Heyf ke seserranê peyênan de dewlete no ziwan Meclîs û heme sazgehanê xo de qedexe kerdo. Dewlete aye sey ziwanêko ke nêyeno naskerdiş ramojna. No hetê komelê kurdan ra nêyeno qebulkerdiş.”
‘Bê birêz Ocalan proses nêreseno amancê xo’
Mahsum Karakoçî bale ante caardişê aştîye ser û îfade kerd ke aştîye cesaretêko pîle wazena. Ey qiseykerdişê xo wina qedêna: “Bakurê Kurdîstanî û Rojhelato Mîyanên de şerêko bêmesal dewam keno. Şer çîyêko bêminet o la virazîyayîşê aştîye zaf zehmet o. Aştîya şerê 50 serran, ma zanê ke zehmetîyê aye zî do bibê. Mîmarê nê prosesî birêz Ocalan o. Wazenê ke ey teberê prosesî de verdê. Bê birêz Ocalan no proses nêreseno amancê xo. Nika proses yewhetî dewam keno û hişê komelî de têmîyanekîyan vejeno werte. Ma wazenê ke rojêk verê aştîyêk virazîyo û dayîkê ma bi nê dej û elemanê hende pîlan reyde ribirî nêmanê.”
