Derbeya sîyasî yê 4ê teşrîna peyêne ya 2016î ser ra ke vera HDP’yî dest pêkerd, 10 serrî vîyartî. Cinîyanê ke şahidîya ê rojan kerda, da zanayene ke îqtîdarê AKP-MHP’yî waşt cinîyanê xoverdayoxan ceza bikero û vat: “Cinî vera zordaran ser nêtewnenê.”
Derbeya sîyasî yê 4ê teşrîna peyêne ya 2016î ser ra ke bi tepiştişê hemserek û parlamenteranê HDP’yî dest pêkerd û bi tayînkerdişê qayûman heme şaristananê Kurdîstanî de vila bî, 10 serrî vîyartî. Na derbe de tewr zaf dezgehê cinî û ciwanan ameyî hedefgirewtene û waşt ke keda bi serran orte ra wedarnê. La cinî û ciwanan bi têkoşîn û xoverdayîşê xo nê waştişî bêtesîr kerd û destkewteyê xo pawitî.
‘Komel bi rayîrê azadîya cinîye aver şino’
Endama Komeleya Edebîyatkaranê Kurdan a Serhedî (KURDÎWAR) Elîf Gemîcîoglu ke o wext xebatkara şaredarîye bîye, da zanayene ke derbe vera fehmo ke Têgêrayîşê Azadîye awan kerdbî ame kerdene û vat: “Sîstemê hemserekîye mîyanê xo de azadî û seypêyî virazeno. Badê derbe sîstemî bitaybetî dezgehê cinîyan kerdî hedef. Wexto ke qayûmî ameyî, verê her çîyî keyeyê pawitişê cinîyan kerdî hedef û dezgehê kultur û ziwanî girewtî.”
‘Cinî hema zî her ca de yê’
Endama Meclîsê Cinîyan ê Şaredarîya Artemêtî Guneş Ogmen Korkmaze vat ke girewtişê dezgehanê cinîyan înan qels nêkeno, xurtêr keno: “Dezgehê cinîyan bi destê qayûman yew bi yew ameyî girewtene, çunke sîstem cinîyan ra terseno. Serra 2025î de zî bi destserronayîşê Şaredarîya Wanî ya Şaristanê Girdî heme dezgehê cinîyan ameyî girewtene. Ma sey cinîyan xoverdayîşê xo domna û dezgeh û kooperatîfê xo reyna yew bi yew awan kerdî. Aştî û aramî zî do bi destê cinîyan bêro.”
‘Waşt ke cinîyanê xoverdayoxan ceza bikerê’
Endama Meclîsê Şaredarîya Artemêtî Zozan Babûre da zanayene ke hêzanê derbekaran waşt bi zor îradeyê şarê kurdî asteng bikerê û vat: “4ê Teşrîna Peyêne şikîyayîşêko tarîxî yo. Amancê bingeyin o bî ke vernîya şarê kurdî bigîrê ke bi nasname, kultur, ziwan û waştişanê xo yê demokratîkan warê sîyasetî de ca bigîro. Înan waşt bi derbeya sîyasî têkilîya şar û sîyasetê demokratîkî bibirnê.”
Aktîvîsta TJA Sînem Çetîne zî vat ke hêrişê qayûman ê vera destkewteyanê cinîyan tesadufî nêbîyî, rasterast vera sîstemê hemserekîye bîyî: “Înan hêzê rêxistinbîyayeyî yê cinîyan ra tersayêne. La ganî bizanê ke destkewteyê cinîyan bi teda û zoran puç nêbenê. Cinî ewro zî xover danê û do destkewteyanê xo bipawê.”
Endama Meclîsê Cinîyan ê DEM Partî ya Êlihî Gulcemal Erdînçe vat ke bi na derba waşt heyfê azadkerdişê Kobanî sîyasetê kurdan ra bigîrê: “Prosesê Aştî û Komelê Demokratîkî est o zî tedayî hîna zêde benê û operasyonî zêde benê.”
