Sazîyê Elewîyanê Stenbolî, 89îna serre dardekerdişê Seyîd Riza û embazanê ey de, Stenbol de programê yadkerdişî viraşt. Yadkerdiş de ame waştene ke cayê mezelanê Seyîd Riza û embazanê ey eşkera bibo û arşîvî bêrê akerdene.
Seyîd Riza û embazê ey, 89îna serre dardekerdişê xo de, zaf bajaranê Kurdistanî û Tirkîya de yad benê. Stenbol de Sazîyanê Elewîyan Îskeleya Kadikoyî de programê yadkerdişî viraşt. Endam û ravêberanê sazîyanê Elewîyan, parlamenterê DEM Partî yê Stenbolî Celal Firat, hemsereka DEM Partî ya Stenbolî Arîfe Çinar, aktîvîsta TJAyî Sabahat Tuncel, temsîlkarê partîyanê sîyasî û zaf kesî beştarê bernameyî bîy.

Yadkerdiş de pankartê “Cayê mezelanê Seyîd Riza û embazanê ey bêro eşkerakerdene” akerdiş bi qurnefîlan “Dêsim 1938” nuştene bîy. Program, saete 19.37 de, qurbanîyanê Dêsimî rê yew deqîqe sukûtî ra dest pêkerd.
‘Şima nêşkenê tarîx û têkoşînê Dêsimî biqedênê’

Dima eşkerayîye ameyê dayene. Eşkerayîye, endamê Merkezê Cipersayişî yê Dêsimî Semra Demîre ra ame wendene. Semra Demîre vat ke 15ê Teşrîna Peyêna 1937î rojêka reş a û vat: “Emrê Seyîd Rizayî kilm kerd, emrê lajê ey zî gird kerd û darde kerdî. Bi hezaran kesan koç kerd, bi hezaran domanê Dêsimî vîndî bîy. 89 serre ravêrd ke Seyîd Riza û embazê ey dar ra kerdî. Hema zî raştî nêvejîyaye, cayê mezelanê Seyîd Riza û embazanê ey nêzanîyeno. Waştişê ma yew o: gerekê cayê mezelanê Seyîd Riza û embazanê ey aşkera bibo. Şima nêeşkenê tarîx û têkoşînê Dêsimî biqedênê.”
‘Gerekê arşîvê dewlete bêrê akerdene’

Dima eşkerayî ra Sabahat Tuncele qisey kerd. Sabahat Tuncel vat ke eke welatêk de şarêk ser birîna xo binalo o wext aştî û edalet senîn awan bibo û vat: “Merdeyê ma peyde nênê, derdê ma vîra ma ra nêşinê, labelê edalet muhîm a. Gerekê ma bi tarîxî ra ribiri bimanê. Gerekê iqtîdar qanûnê uzir waştene vejo. Ewilî ena hewce ya. Eke dewlet vano aştî beno, gerekê arşîvê dewlete bêrê akerdene. Birêz Ocalanî vat: ‘Ma mesela Kurdî dar ra arde masa ser.’ Coka gerekê ma xo organîze bikerê. Hetâ ke cayê mezelanê Seyîd Riza û embazanê ey nêvînê, têkoşînê ma dewam bikero.”
Peynî de girseyî qurnefîlî destê xo seba aştî û demokrasî eştî derya û program qedîya.
















