KNK’yî waşt ke cayê mezelanê Seyîd Riza û 6 embazanê ey û raştîyê tarîxî yê Dêrsimî bêrê eşkerakerdiş. KNK’yî dîyar kerd ke Seyîd Riza sembolê nasname û xoverdayîşî yo.
Konseyê Îdareyî yê Kongreyê Neteweyî yê Kurdîstanî (KNK) bi munasebetê serrgêra dardekerdişê Seyîd Riza û 6 embazanê ey eşkerayîyêke da. Eşkerayîye wina ya:
“15ê teşrîna peyêne ya 1937î de Seyîd Riza û 6 embazê ey ameyî dardekerdiş la ê qet vîr ra nêyenê kerdiş.
15ê teşrîna peyêne ya 1937î de Seyîd Riza bi qerarê îqtîdarê ê wextî Xarpêt de ame dardekerdiş. Na hadise tarîxê şarê kurdî û taybetî zî yê şarê Dêrsimî de bîye rojêka tarîye û vîrê şarê kurdî û elewîyanê Dêrsimî de sey birînêka kûre menda.
Seyîd Riza tarîxê şarê kurdî yê Dêrsimî de bîyo sembolê xoverdayîş, şeref û pawitişê nasnameya şarî. Dardekerdişê ey û embazanê ey tena cuya kesayetêk nêqedêna; çarçeweya hadiseyanê trajîkan ê Dêrsimî yê serranê 1937-1938î de bî parçeyêkê dej û felaketê ke ame serê şarê Dêrsimî.
Ewro, serrgêra dardekerdişê ey de, ma bi hurmet nameyê Seyîd Riza û heme qurbananê Dêrsimî vîr anê.
Ma wazenê ke raştîya tarîxî bêra zanayîş, cayê mezelê Seyîd Riza û embazanê ey bêro eşkerakerdiş, veng û waştişê şarê ma bêrê eşnawitiş. Wa raştî bêra zanayîş, wa tarîx vîr ra nêbo û wa dejêko winayên serê tu şarî de dubare nêbo.
Bawerîya ma a ya ke nê demo newe de, Prosesê Aştî û Komelê Demokratîkî de şar bi nasnameya xo, bi pawitişê ziwan, kultur, bawerî û tarîxê xo eşkeno biciwîyo.
Seyîd Riza, nameyê to tarîx de ameyo nuştiş. Ma seba vîrardiş, seba edalet û seba şerefê merdimîye vengê xo berz kenê û wayîrê mîrasê şima vejîyenê.
Wa vîrê Seyîd Riza her tim ganî bimano. Ma bi hurmet Seyîd Riza, embazanê ey û heme qurbananê qetlîamê Dêrsimî anê vîrî.”








