Xarpêt – Seyîd Riza û embazê ey serrgêra 89. ya dardekerdişê înan de Xarpêt de bi panelêk ameyî vîrardene. Panel de ame vatene: “Ganî dewlete heqîqetî reyde bêra têrî û bi raştî efu biwazo.”
Rêxistina DEM Partî ya Xarpêtî bi munasebetê serrgêra 89. ya dardekerdişê Seyîd Riza û embazanê ey bînayêk de panelêk organîze kerd. Salono ke panel tede ame viraştene de pankartê “Serrgêra 89. de wa cayê mezelanê Seyîd Riza û merdeyanê ma yê bêkefenan bêro eşkerakerdene” ame dardekerdene. Moderatorîya panelî hetê Hemverfeka Komîsyonê Şaran û Bawerîyan ê DEM Partî Yuksel Mutlu ra ameye kerdene. Sîyasetmedare Gultan Kişanake, Mustafa Aslanî Federasyonê Elewî-Bektaşîyan û tarîxnas-nuştox Yalçin Çakmak zî sey qiseykerdoxan panelî de ca girewt. Temsîlkarê partîyanê sîyasîyan û sazgehanê komelê sîvîlî, tornê Seyîd Riza û zaf kesî tewrê panelî bîyî. Panel verê cû bi roşnkerdişê çirayan û vilakerdişê loqmeyan, dima zî bi hurmetmojnayîşê seba vîrardişê qurbananê Terteleyê Dêrsimî dest pêkerd.
‘Seyîd Riza edalet waşt, dewlete dewa ey veşnaye û qirkerdiş da destpêkerdiş’
Yuksel Mutlu da zanayene ke Terteleyê Dêrsimî tena qetlîamêk nîyo, amancê ey çinkerdişê şarêkê pêroyî bî û vat: “Seyîd Riza sembolê xoverdayîşêko pîl o.”
Tarîxnas Yalçin Çakmakî zî bale ante ser ke sîyasetê Osmanîyan ê vera Dêrsimî dewleta komare de zî dewam kerdo. Yalçin Çakmakî dîyar kerd ke raporan de Seyîd Riza ameyo hedefkerdene û vat: “Seyîd Riza sere nêwedarna, eskerî nêkiştî; serra 1933î de lajê ey Bava ame kiştene. Wexto ke Seyîd Riza edalet waşt, dewlete dewa ey veşnaye û qirkerdiş da destpêkerdiş.”
‘Waştişê ma yo tewr sereke eşkerakerdişê cayê mezelan o’
Gultan Kişanake zî îfade kerd ke muhakemeyê Seyîd Riza û Şêx Seîdî huqûqî nêbî, sîyasî bî û hema zî nêyeno zanayene ke kamcîn mehkeme de ameyî muhakemekerdene û vat: “Hetanî ke heqê welatijîya seyyewbîne nêbo, neheqî dewam kena. Wextê Prosesê Aştî de babeta tewr muhîme heqîqet û efuwaştiş a. Waştişê ma yo tewr sereke eşkerakerdişê cayê mezelan o. Eke dewlete heqîqetî reyde rî bi rî nêbo û efu nêwazo, no a mana dano ke ‘eke reyna firsend bivîno, reyna keno’.”
Peynî de Mustafa Aslanî qisey kerd û da zanayene ke sîyasetê kîn û nefretî yo ke vera elewîyan o, hema dewam keno û vat: “Ganî ma wayîrê mîrasê Seyîd Rizayan vejîyê. Têkoşînê rêxistinkerdeyî ra remayîş çareserkerdiş nîyo. Hetanî ke ma wayîrê nasname û bawerîya xo nêvejîyê, dewlete do vîr ra nêkero ke ma elewî yê.”
Panel dima bi pers û cewaban qedîya.
