Îstanbul – Hepsî Mehmet Bagriyanik badê 30 serr û 8 aşman Hepisxaneyê Hûmara 2. yê Bandirma ra texlîye bî. Mehmet Bagriyanikî dîyar kerd ke o 30 serrî ney, 60 serrî zî eşkeno hepsî bimano, çunke mesele meseleyê estbîyayîşî yo.
Mehmet Bagriyanik serra 1996î de Dîlok de ameybi tepiştiş. Badê 30 serre û 8 aşman Hepisxaneyê Hûmara 2. yê Bandirma ra texlîye bî. Mehmet Bagriyanik serra 1999î de hepisxane de tewrê çalakîya ‘Şima Nêeşkenê Roja Ma Tarî Bikerê’ bîbi û bedenê xo dabi ver adirî.
Mehmet Bagriyanik hetê Komeleya MATUHAYDER’î, temsîlkaranê sazgehanê sîvîlan û keye û merdimanê ey ra verê hepisxaneyî de bi vilikan ame pêşwazîkerdiş.
‘Nê ra pey ma do seba sîyasetê demokratîkî bixebitîyê’
Mehmet Bagriyanikî badê ke texlîye bî, verê hepisxaneyî de qisey kerd. Mehmet Bagriyanikî dîyar kerd ke o 30 serrî ney, 60 serrî zî eşkeno hepsî bimano û wina vat: “No mesele meseleyê estbîyayîşî yo. Ganî kesê ke têkoşînê estbîyayîşî kenê, seba ke lingan ser o bimanê têkoşîn bikerê. Seba nê çîyî çi ke destê ma ra ame, ma kerd. Badê 30 serran ma hepisxane ra vejîyayî. Nê ra pey ma do seba sîyasetê demokratîkî bixebitîyê.”
Mehmet Bagriyanik do şoro Dîlok.
