Riha – Platformê “Şiyar Be Riha” awanbîyayîşê xo îlan kerd û vera xebitnayîşê madeyanê hişbiran û fuhuşî veng da têkoşînêko hîra. Platformî waştişê xo yê ke bale anceno pawitişê domanan û têkoşînê vera tiryakîye ser zî eşkera kerdî.
Platformê Şiyar Be Riha ke demeko Riha de warê têkoşînê vera xebitnayîşê madeyanê hişbiran û fuhuşî de aktîf o, awanbîyayîşê xo bi hawayêko resmî îlan kerd. Eşkerayîye merkezê Konfederasyonê Sendîkayanê Karkeranê Kamuyî (KESK) de ame dayîş û tede temsîlkarê zaf rêxistinanê komelê sîvîlî û partîyanê sîyasîyan ê şaristanî amade bîyî. Eşkerayîya çapemenî hetê hemverfeka Platformê Şiyar Be Riha Zuhal Parlake ra ame wendiş.
Zuhal Parlake bale ante ser ke emrê xebitnayîşê madeyanê hişbiran Kurdîstan û Tirkîya de her ke şono kêm beno û vat: “Raştîya ke domanî emrêko hende qijkek de eşkenê biresê madeyanê hişbiran, polîtîkayêka ‘şerê taybetî’ ya. No hal ganîyîyêk vejeno meydan: ganî sazgehê berpirsîyarî yê pawitişê domanan, sazgehê komelkî, sîstemê perwerdeyî û mekanîzmayê çimdarîye bi hawayêko cidî bêrê persayîş û cigêrayîş. Ganî madeyê hişbirî, îstîsmar, fuhuş û çalakîyê çeteyan ê ke înan reyde yenê, pêro sey polîtîkayêka şerê taybetî bêrê dîyayîş.”
Zuhal Parlake dîyar kerd ke no çî problemêko hîna hîra virazeno û vat: “Şîrovekerdişê problemê tiryakîye tena bi operasyonanê kuçeyan, tepiştişan û cezayanê sucî, a mana dano ke pîlîya raştîne ya problemî yena îhmalkerdiş. Persê raştînî ke ganî bêrê persayîş nê yê: Domanî senî eşkenê biresê madeyî Rêxistinê ke peyê nê bazirganîye de yê, senî eşkenê bixebitîyê? Vera şebekeyanê sucdaran ê ke domanan îstîsmar kenê têkoşînêko bes est o? Hîna muhîm, ganî têkilîyê mabênê bazirganîya tiryakîye û îstîsmarê seksuelî yê domanan, înan mîyan de tewrêkerdişê înan ê bi zorî yê şebekeyanê fuhuşî, bi hawayêko hîra û pêro pîya bêrê cigêrayîş.”
Eşkerayîye bi çepikan qedîyaye.
