Qezaya Geverî ya Colemêrgî de bi pêşengîya Komeleya Cinîyan a Star vera tacîz, destdergî, fuhûş û hişbiran rayîrşîyayîşêk ame kerdene.
Qezaya Geverî ya Colemêrgî de bi pêşengîya Komeleya Cinîyan a Star vera destdergîya ser estbîyayîşê cinîye, fuhûş û hişbiran rayîrşîyayîşêk ame kerdene. Rayîrşîyayîş de sloganê “Jin Jiyan Azadî” û “Mêr Dikuje Dewlet Diparêze” ameyî vatene. Dayîkê Aştîye, parlamenterê DEM Partî, Platformê Sazgehanê Demokratîkan, îdarekarê ÎHD’yî yê Colemêrgî, endamê TJA’yî û zaf welatijî rayîrşîyayîş de ca girewt.
Badê rayîrşîyayîşî eşkerayîyêk ameye dayene. Metnê eşkerayîye hetê endama Komeleya Cinîyan a Star Omur Çîftçî ra ame wendene.
Omur Çîftçî destdergîya ke vera estbîyayîşê cinîye yena kerdene şermezar kerde. Aye dîyar kerd ke destdergîya cinîye ser nêyena cezakerdene û no hal rayîrê sucanê neweyan akeno.
Omur Çîftçî da zanayene ke Gever de hetê Necat Koparan û Eray Oguzî ra vera gedeyêka 13 serreye hedîseyêkê destdergî virazîyayo la sucdarî nêameyê muhakemekerdene û dewlete destdergîya camêrdan pawita. Omur Çîftçî dîyar kerd ke ganî vera na destdergîya cinîyan ser têkoşînê cinîyan bêro xurtkerdene.
‘Dewlete sucdaran pawena’
Badê eşkerayîye parlamentera Colemêrgî Oznur Bartine dîyar kerd ke demanê peyênan de Kurdîstan de hêrişê ser ciwanan, bitaybetî tacîz, tecawuz, fuhûş û hişbir zêde bîyê. Aye va ke dewlete na destdergî nimnena, pawena û sucdaran ef kena.
Badê eşkerayîye rayîrşîyayîş bi sloganê “Jin Jiyan Azadî” qedîya.
