Wan – Rixmê Prosesê Aştî û Komelê Demokratîk yo ke Rayberê Şarê Kurdî Abdullah Ocalanî nêzdîyê di serran o dayo destpêkerdiş zî, hepisxaneyan de binpaykerdişê heqan dewam kenê û nê prosesî de pêro pîya 16 hepsîyanê nêweşan cuya xo vîndî kerda. Hemserekê MEBYA-DER û TUHAY-DER’î yê Wanî û welatijan reaksîyonê xo îhmalê dewlete rê mojna û waşt ke hepsîyê nêweş û sîyasî tavilî bêrê azadkerdiş.
Bi vengdayîşê Rayberê Şarê Kurdî Abdullah Ocalanî yê 27ê sibate ya 2025î Prosesê Aştî û Komelê Demokratîkî dest pêkerd. Badê destpêkerdişê prosesî Têgêrayîşê Azadîye têkoşînê çekdarî vindarna, Tirkîya ra xo ante, kongreyê xo viraşt û bi merasîmêk bi hawayêko sembolîk çekî veşnayî. Bi eştişê nê gaman reyde demokratîkbîyayîşê Tirkîya û eştişê gamanê şênberan bî babeta munaqeşeyan. 10ê tebaxe ya 2026î de hetê parlamentoyê Tirkîya ra qanûnê çarçeweyî ame vetiş, la hetanî ke Rojnameya Resmîye de nêbêro weşanayîş, nêkeweno felîyet. Caardişê teberê qanûnî yê hepisxaneyan û rewşa hepsîyanê nêweşan rojane yenê munaqeşekerdiş; rixmê averşîyayîşanê prosesî zî bêhuqûqî û bêqanûnî dewam kenê.
Hemserekê Komeleya MEBYA-DER’î ya Wanî Yusuf Dundar, Hemserekê Komeleya TUHAY-DER’î ya Wanî Osman Başak û welatijan derheqê caardişanê ke hepisxaneyan de dewam kenê de ajansê ma rê qisey kerd.
‘Înfazê embazanê ma bi keyfî yenê veşnayîş’
Hemserekê MEBYA-DER’î Yusuf Dundarî bale ante Prosesê Aştî û Komelê Demokratîkî ser û wina qisey kerd: “No proses 27ê sibate ya 2025î de hetê Serekatî ra ame destpêkerdiş. Şarê kurdî bi Serekatîya xo û rêxistina xo bawer kerd û na bawerî zaf xurt a, la hetanî nika hetê sîstemî ra tu gam nêameya eştiş. Rixmê ke ame vatiş verê her çîyî do hepsîyê nêweşî bêrê azadkerdiş zî, nika bi seyan embazê ma yê nêweşî hepisxaneyan de yê û hema nêameyê azadkerdiş. Nika hepsîyê nêweşî est ê ke cezayê înan qedîyayo, la înfazê înan bi hawayêko keyfî yenê veşnayîş û reyna zî nêyenê azadkerdiş.”
‘Tuncer Saglamî sebebê îhmalê dewlete ra cuya xo vîndî kerd’
Yusuf Dundarî ard vîrî ke peynî de hepsîyo nêweş Tuncer Saglam sebebê nêzdîbîyayîşê dewlete yê hepsîyan ra cuya xo vîndî kerdo û wina dewam kerd: “Embazê ma Tuncer Saglam ke dewêkê Wanî ra bî, Hepisxaneyê Wanî de nêweş kewt. Ey berdî nêweşxane, la sîstemî qet goş nêda ey, ey reyde eleqedar nêbî û nêweşîya ey rê tu teşhîs nêna. Dima netîceyê tayê cehdanê burokratîkan de ey berdî nêweşxaneyêkê Ankara, la heyf ke uca cuya xo vîndî kerd. Ma zaf xemgîn ê; ma cenazeya ey pêşwazî kerde, arde û defin kerde.”
‘16 embazê ma hepisxaneyan de wefat kerd’
Hemserekê TUHAY-DER’î Osman Başakî derheqê prosesê ke dewam keno de bale ante rewşa hepisxaneyan ser û da zanayîş ke 52 hepsîyê nêweşî est ê ke rewşa înan zaf giran a û wina vat: “Nêzdîyê di serran o no proses dest pêkerdo û ma pêro û şarê ma bi hêvîya ke na gonî vindero û nê welatî de aramîyêk bêro, zaf kêfweş bîyî. Şarê ma piştdayîş da nê prosesî ke çîyêko baş bibo. La heyf ke di serrî yo tena hetê kurdan ra gamî ameyî eştiş û hetê dewlete ra gamê şênberî nêameyî eştiş. Coka şar xemgîn o û bawerîya şarî ya prosesî roje bi roje şikîyena. Coka hêvîya ma aye ke dewlete demêko kilm de gamêka şênbere bierzo ke bawerîya şarî xurt bibo. Nê di serran de 16 embazanê ma hepisxaneyan de wefat kerd; yo peyên zî embaz Tuncer Saglam bî. O Hepisxaneyê Emnîyetê Berzî yê Wanî de bî û nêweşîya kanserî kewtbî ey, la çunke tedawîya ey baş nêame kerdiş, badê ke berdî Ankara, uca wefat kerd.”
‘Heyetê ke ameyê awankerdiş teberê huqûqî de yê’
Osman Başakî dewamê qiseykerdişê xo de dîyar kerd ke HPG’yî vera Tirkîya têkoşînê çekdarî ra fek veradayo û waşto ke rayîrê aştî abo. Osman Başakî ard vîrî ke dewlete hema zî cewabê gamanê Têgêrayîşê Azadîye nêdayo û nê çîyî vatî: “Dewlete vat wa gerîla çekanê xo rono û uca çekî ameyî ronayîş, la ewro hepisxaneyan de dest û lingê embazanê ma girêdaye yê, zulm û îşkence înan ser o yeno kerdiş. Bi rayîrê heyetanê ke ameyê awankerdiş, bi hawayêko teberê huqûqî cezayê înan derg kenê, azadkerdişê înan erey erzenê û înan azad nêkenê. Ganî dewlete gamêke bierzo, hepsîyê nêweşî tavilî bêrê azadkerdiş û dima zî heme hepsîyê sîyasî azad bibê.”
‘Serektî û Têgêrayîşê Azadîye gamî eştî, êdî sira dewlete ya’
Welatijanê Wanî zî helwestê hukmatî yê vera hepsîyan rexne kerd, dîyar kerd ke prosesê ke ameyo destpêkerdiş biqîymetin o û îfade kerd ke nê gamanê biqîymetinan reyde ganî dewlete zî gamanê şênberan bierzo.














