Koordînasyonê RAJINî serra 29. ya şehadetê Gurbetellî Ersoz de a yad kerde û dîyar kerd ke rojnamegerê cinî do gêrayîşê raştîye û têkoşînê çapemenîya azade rêça mîrasê aye de dewam bikerê.
Koordînasyonê Ragihandina Jin (RAJIN) Gurbetellî Ersoz ke tarîxê rojnamegerîya kurdan de sernuştoxa verêne ya cinî bîye, serra 29. ya şehadetê aye de yad kerde û vat: “Ma do dewam bikerê ke raştîyan cigêrê, eşkera bikerê û biresnê.”
Gurbetellî Ersoz serra 1965î de dewa Zîver a qezaya Palo ya Xarpêtî de ameye dinya. Badê Fakulteya Kîmya ya Unîversîteya Çukurova lîsansê berzî kerd û sey asîstane xebitîye. Serra 1993î de badê ke hepisxane ra vejîyaye, bîye sernuştoxa Rojnameyê Ozgur Gundem; ameye tepiştene û îşkenceyêka girane dîye. 1995 ra pey sey gerîla koyanê Kurdîstanî de cuya xo dewam kerde û 8ê teşrîna verêne ya 1997î de Başûrê Kurdîstanî de kemîneyêka tankan de şehîd bîye.
RAJINî dîyar kerd ke roja şehadetê aye, 8ê teşrîna verêne ya 2014î ra nata, sey Roja Rojnamegeranê Cinîyan ê Kurdan yena pîrozkerdene û wina vat: “Hetê dewletan ra rojnamegerî hema-hema sey sûc yena hesibnayene; hesabê medyaya dîjîtale û keyepelê xeberan yenê girewtene. La ma sey rojnamegerê cinî yê ke rêça Gurbetellî de yê, nêvindenê.”
RAJINî dîyar kerd ke ê do vera fehmê cinsîyetperestî yê medya de têkoşîn bikerê û bibê vîr û vengê cinîyan û heme bindestan. Eşkerayî de Şevîn Bîngol, Şîlan Aras, Denîz Firat, Nagîhan Akarsel û heme şehîdê çapemenîya azade zî ameyî yadkerdene.
RAJINî ard vîrî ke Rayber Apoyî mesajê xo de seba Merasîmê Xelatanê Rojnamegerîya Cinîyan ê Gurbetellî Ersoz vatbî: “Gandarkerdişê vîrameyîşê Gurbetellî û resnayîşê fikr û têkoşînê aye yê neslanê ameyoxan, wezîfeyê ma pêrune yo.”
