Netîceyê Xelatanê Rojnamegerîya Cinîyan ê Gurbetelli Ersoz yê 2. ameyî eşkerakerdene. Muxabira ajansa ma Sema Gezîcî beşê fotografan de Xelata Taybetîye ya Jurî girewte.
Xelatê Rojnamegerîya Cinîyan ê Gurbetelli Ersoz 2 serrî yo bi pêşengîya Komeleya Rojnamegeran a Cinîyan a Mezopotamya (MKG) yenê organîzekerdene. MKG netîceyê xelatan bi eşkerayîyêka nuştekîye eşkera kerdî.
MKG dîyar kerd ke xelatî seba xurtkerdişê têkoşîn û gêrayîşê raştîye yê rojnamegerîya cinîyan û seba ke mîrasê Gurbetelli Ersoz ciwîyaye bimano, yenê dayene.
Beşê Xeberanê Kurdkî de jurî Suna Tunç, Hatîce Kamer û Leyla Ayaz bî. Xelata yewinîye ameye dayene xebera Perêz Remezan a bi sernameyê “Çîroka Aske Kerîm: Birîndarek zindî ya karesata Enfalê û hovîtiya li Nugre Selman”. Jurî dîyar kerd ke xebere bi ziwanêko sade û eşkera ameya nuştene û hem şahidîya hadîseyî hem zî ya tarîxî kena.
Beşê Xeberanê Tirkî de jurî Tugçe Tatarî, Ayşe Guney û Elîf Ekin Saltik bî. Xelata yewinîye ameye dayene xebera Elîf Akgul a ke Inside Turkey de weşanîyaye û resayîşê çekanê bêruxsetan ê Tirkîya ser o ya. Xelata Taybetîye ya Jurî zî ameye dayene xebera Gulîstan Gulmuş û Derya Ren a JINNEWSî; xebere derheqê cinîyêka de ya ke 14 serrî rastê şîdetê sîstematîkî ameya.
Beşê fotografan de zî muxabira ajansa ma Sema Gezîcî bi xebata xo ya bi nameyê “Qêrîna Bêdeng” Xelata Taybetîye ya Jurî girewte.
Juriya Kategorîya Xeberanê Vîdeoyî: Solîn Alphan Başegmez, Çîlem Kuçukkeleş û Rojbîn Ekin.
Xelata yewîne ya kategorîya Xeberanê Vîdeoyî de dîyaye berhema bi nameyê ‘Hêvîya Ageyrayîşî’ (Hêviya Vegerê) ke bi hemparî hetê rojnamewanî Sewsen Elî û Meryem Reşo ra ameya amadekerdene.
Nirxnayîşê jurî yê seba kategorîya Xeberanê Vîdeoyî wina ya:
Sewsen Elî rojnamewanêka ke serra 2002yî de Serêkanîye de ameya dinya. Belka zî aye 9 serrîya xo de dest pêkerdo ke bibo şahida şerê Sûrîyaye yo ke serra 2011î de dest pêkerd. Sewsen Elî mîyanê şert û mercanê şerî de pîşeya rojnamewaneyî musaye û koçberîya dima ra ya Serêkanîye ke serra 2019î de qewimîyaye zî bi xo tecrubeyê ci kerd.
Sewsen Elîya ke pîya bi hemkare/hempîşeya xo Meryem Reşo bernameyê ‘Hêvîya Ageyrayîşî’ viraşta, ciwîyena cinîyanê ke mecbûr mendê koç bikerê ana ekrananê JIN TVyî ser.
Xebera Sewsen Elî ma bena kampanê ke ma zaf rey vîr ra kenê û verê cinîyanê ke nê kampan de seba weşîye têkoşîn kenê. Zehra Hesena ke xebere de aye dir pêvînayîş virazîyayo, hema zî kîlîtê banê xo yo ke Serêkanîye de mecbûr menda biterikno xo deste de gêna û paçik kena; ena rewşe çadirê kampî yê bêkîlît ardê vîrê ma heme; cinîyê ke mifteyê înan estê la nêşênê agêrê keyeyê xo.
Agêrayîşê Zehra Hesen ra ma fehm kenê ke a hewt serrî yo hewl dana nê kampî de biciwîyo. Labelê kampî cayê cuye nîyê; ê cayê vurnayîş û derbazbîyayîşî yê. Hetê bînî ra, Zehra Hesen hewt serrî yo yew wareyo derbazbîyayox de ciwîyena, la bingehê xo de bêca ciwîyena. A bêrîka xo de hêvîya ke rojeke agêro keyeyê xo yo raştikên û reyna berê xo akero.
Sewsen Elî bi rêya xebera xo, heqîqetê cuye yê kampî, xirabîye reyna mojnena…
