Fuarê Kitaban ê Amedî yo 10. qedîya. Hemverfekê YEW-KURDî Jêhat Rojhilatî vat ke ganî dezgeh, sîyaset û şaredarî derheqê na mesela de bi şeklêko stratejîk bifikirîyê: “Ganî serra ameyoxe ma hîna xurt wayîrîya ci bikerê.”
Fuarê Kitaban ê Amedî yo 10. ke hetê Yewîya Weşangeranê Tirkîya, Odaya Bazirganî û Sanayîye ya Amedî, Şaredarîya Amedî ya Şaristanê Girdî û TUYAP’î ra Merkezê Fuar û Kongreyî yê Mîyanneteweyî yê Mezopotamya de ame organîzekerdene, 9 rojî dewam kerd û vizêr qedîya. Nêzdîyê 30 weşanxaneyê kurdkî beşdarê fuarî bîyî.
Hemverfekê Yewîya Weşangeranê Kurdan (YEW-KURD) Jêhat Rojhilatî vat ke 10 serrî verê cû badê cehdê darbeyî komelî de şikîyayîşêk bî û komel hema zî rehet nîyo: “Merdim verê ke kitabêko ke derheqê kurd û Kurdîstanî de nuşto bigîro, xo ra pers keno: ‘Bigîra yan nêgîra? Do çîyêk bêro sereyê mi?'” Rojhilatî dîyar kerd ke averşîyayîşê dîjîtalî zî tesîr kerdo û merdimî kitaban înternet ser o herînenê.
Rojhilatî vat ke emsal reklamê fuarî rind nêameyî kerdene: “Verê cû Êlih ra heta Mêrdînî reklamî ameyêne kerdene; emser tena nê şaristanî de 40-50 pankartî ameyî aleqnayene. Şar zaf haydar nêbî.”
Rojhilatî vat ke wendoxî kêmî nêbîyê, la weşanxaneyî zêde bîyê û seba zehmetîyanê ekonomîkan nêşenê çerxa xo bigêrnê: “Ganî no şaristan bi dînamîk, dezgeh, şaredarî û sîyasetê xo cehd bikero. Ganî ma êdî birîna xo bi xo derman bikerê.”
Rojhilatî vat ke eke piştîdayîşêko sîyasî û komelkî çin bo, YEW-KURD tena xo bi xo nêşeno çîyêk bikero: “Wexto ke ma vanê ‘ziwanê ma rûmetê ma yo’, ganî ma bi xo wayîrê xo vejîyê. Ganî dezgeh, sîyaset û şaredarî bi şeklêko stratejîk bifikirîyê; eke rojane bifikirîyê, ameyox de do problemê hîna xorînî vejîyê.”
