AMED – Torra Têkoşînê Vera Şîdetî ya Amedî vera zêdebîyayîşê qirkerdişê cinîyan verê Edlîyeya Amedî de dest bi nobete kerd. Endama Baroyê Amedî Avûkat Cansel Talaye bale ante teda û şîdetê vera cinîyan ser o û vat: “Ma cuyêka seypêye, azade û biemnîyete wazenê.”
Torra Têkoşînê Vera Şîdetî ya Amedî vera zêdebîyayîşê qirkerdişê cinîyan verê Edlîyeya Amedî de dest bi “Nobeta Cinî, Edalet û Vîrî” kerd. Hemşaredarê qezayanê Amedî, rayberê partîyanê sîyasîyan, komeleyê cinîyan, temsîlkarê dezgehanê sîvîlan û zaf cinî beşdarê nobete bîyî. Nobete do 10 hewteyî dewam bikera. Nobete de pankartê “Cinî Nobeta Edalet û Vîrî Gênê” ame akerdene û cinîyan bêvindertiş sloganê “Jin Jiyan Azadî”, “Kiştişê Cinîyan Polîtîk o” û “Bijî Têkoşînê Cinîyan” berz kerdî.
Cansel Talaye eşkerayî wende û dîyar kerd ke nobeta înan a verêne de do hîkayeyanê Ayfer Çakmak a Amedî, Fatma Çîgîlî ya Kocaelî, Betul Arik a Sakarya û Nalan Temelkiran a Kutahya biwanê: “Ma Buse Akgun Goke ke Ankara de ganê xo ra bîye, Dr. Ozlem Gultekîne Çelîk ke derheqê merdişê aye yê şikdarî de Îzmîr de tehqîqat dewam keno, Gokçe Alkane ke Bursa de ameye kiştene û Zekîye Cane ke Mêrdîn de bi şeklêko şikdar ganê xo ra bîye, sey parçeyêkê nobeta xo ya edalet û vîrî yad kenê. Nê nameyî lîsteyêka temame ya heme cinîyan nîyê ke ganê xo ra bîyê; ma nê nameyî agahîyanê raya pêroyî ra arê kerdê.”
“Ma cuyêka wazenê ke tede azadîya cinsî est a”
Cansel Talaye dîyar kerd ke bajarê cîyayî, cuyê cîyayî û hîkayeyê cîyayî est ê, la heq û waştişê heme cinîyan yew o û qiseykerdişê xo wina qedêna: “Cuyêka seypêye, azade û biemnîyete. Ma tena bi edaletêk razî nêbenê ke badê şîdetî dekewo dewre û bi cezaya faîlî sînordar bimano. Ma wazenê cuyêka bi azadîya cinsî awan bibo ke tede cinî verê ke rastê şîdetî bêrê, bê ke azadîyanê xo ra fek verdê, derheqê cuya xo de bi keyf û bêters qeraran bidê.”
Cinîyan da zanayene ke do her sêşemeyî nobeta xo dewam bikerê.
