Têkoşînê Komela Cinîyan a Dêrsimî seba Gulîstan Doku bêmabên dewam keno. Nîlufer Akdag vana: “Cinîyê Dêrsimiji wazenê ke kesanê ke kiştişê Gulîstan Doku de ca girewto û bêçika xo mîyanê nê kiştişî de ra, bêceza nêmanê. Seba naye û seba cayê mezela Gulîstan bêro vînayîş zî 6 serrî yo ke têkoşînê xo domnenê.”
Dimayê şeş serran cipersayîşê kiştişê Gulîstan Doku, wendekara Unîversîteya Munzurî ke 5ê çeleyê 2020î de Dêrsim de ameybî vîndîkerdiş tayê averşîyayîşî bîyê û terba walîyê ê demî Tuncay Sonelî zaf kesî ameyî girewtiş la cayê mezele hîna zî dîyar nîyo.
Komela Cinîkan a Dêrsimî, seba dewaya Gulîstan Doku têkoşînê xo domnenê û vanê ke ma do dewaya Gulîstan Doku de peyser nêvindenîme.
Komela Cinîkan a Dêrsîmî ra Nîlufer Akdag, dewaya Gulîstan Doku û paştîdayîşê Cinîyan ê Dêrsimî ser o ma rê qisey kerd.
‘Wazenîme ke jû mezela Gulîstan Doku biba’
Komele Cinîyan a Dêrsîmî ra Nîlufer Akdag, wina vana: “Gulîstan Doku 6 serrî yo ke vîndîbîyaye ya. O wext Walîyê Tuncelî û sazîyanê dewlete vatêne ke ‘Gulîstan xo eşto awe’ û waştêne ke her kes henî bizano. Keyeyê Gulîstan û şarê Dêrsimî dormeyê Awa Munzurî de xeylî serrî fetelîyayî. Ma zanîtêne ke pêroyê înan zurî erzenê. Ma zanenîme kamî se kerdo. Nê welatî de kam ke bi vindî zanenîme ke destê dewlete vindîbîyayîşê ey de est o. Ma zanitêne pê nê karî de çi est o. La destê ma de çîyê çin o. Çi est o destê dewlete de ro. Ma pê nêeşkîyayîme. Ê yê ke paştîya xo na dewlete ra gênê, ê yê ke zerê dewlete de kar kenê înan zanitêne se bîyo.
Ma şeş serrî nêvindetîme, ameyme pêser û ma pers kerd va ‘Gulîstan Kotî ya?’ Keda cinîyan yê keyeyê Gulîstan û şarê Dêrsimî raver şî. Walî û dozgerê verî şî dozgera newîye ameyê û kewtê dimayê na dawa. Zaf kesî girewtî la hona kî mezela Gulîstan nêameya dîyayene. May û pîyê aye, wayî û birayê aye wazenê ke cayê mezela aye bizanê.”
‘Cinî bîndestîye de mendê’
Nîlufer Akdag peynîya qiseykerdîşe xo de bindestîya cinîyan ser o vinderê: “Cinîyan ser o zordarîye est a. Zaf cayan de xeylî cinîyî yenê kiştiş, yenê vîndîkerdiş. Cinîyî teber de, keye de, her ca de zordarîye vînenê. Cinîyî zaf heşîrîye vînenê. Tayê nînan benê eşkera, tayê nînan kî to nêzanena ke çi bîyo. Gerê ma cinîyî paştî bidim jûmînî. Xeleşîya cinîkan ûnca destê xo der a.”
