DEM Partî bi munasebetê 7ê teşrîna peyêne, Roja Ziwanê Lazkî, eşkerayîyêk daye. DEM Partî dîyar kerd ke polîtîkayê asîmîlasyonî kultur û ziwananê herême qedênenê û venga pawitiş, musayîş û xebitnayîşê ziwanê lazkî da.
7ê teşrîna peyêne sey “Roja Ziwanê Lazkî” yena pîrozkerdiş. DEM Partî bi eşkerayîyêka nuştekî bale ante muhîmîya pawitişê ziwanê lazkî ser û waşt ke ziwanê dayîke bin garantîya qanûnê bingeyî de bê.
DEM Partî eşkerayîya xo de qetî kerd ke lazkî tena hacetêkê têkilîye nîyo. Lazkî eynî wextî de xezîneyêka kulturîye ya bêmesale ya ke tarîxê fekkî, vîro kolektîf û xozaya Deryaya Sîyaye xo mîyan de gêna.
Eşkerayîye de ame vîrardiş ke 7ê teşrîna peyêne tarîxê lazan de di manayê zaf muhîmî ê ci est ê: “Yew, 7ê teşrîna peyêna 1929î de rojnameya lazkî ya verêne Mç’ita Murutsxi (Astareya Sûre) weşanayîş dest pêkerdo. Dîyin, roja ameyîşê dinya ya hunermendê muzîka lazkî Kazim Koyuncuyî ya.”
‘Asîmîlasyon merdişêko kulturî yo’
Eşkerayîye de ame vatiş ke seba polîtîkayanê yewperest û înkarkeran ê ke serran o yenê caardiş, zaf ziwanê sey lazkî, kurdkî, hemşînkî, çerkezkî û suryankî cuya komelkîye ra ameyê birnayîş. Warê perwerde û zanistî û heme waranê komelkîyan de ameyê astengkerdiş. Ame vatiş ke qelsbîyayîşê ziwanê lazkî ke hetê UNESCO’yî ra mîyanê ziwananê bin tehlukeyî de ca gêno, seba heme merdimîye vîndîbîyayîşêko pîl o.
‘Waştişê DEM Partî’
DEM Partî dîyar kerd ke heqê her şarî yo ke bi ziwanê xo yê dayîke qisey bikero, bifikirîyo û perwerde bivîno. Aye waştişê xo wina rêz kerdî:
- Ganî lazkî û kulturê lazan bin garantîya qanûnê bingeyî de bê.
- Ganî heqê perwerdeyê bi ziwanê dayîke bêro naskerdiş.
- Ganî unîversîteyan de beşê Ziwan û Edebîyatê Lazkî û merkezê cigêrayîşî bêrê akerdiş.
- Ganî astengê verê xebitnayîşê ziwanê lazkî yê xizmetanê umûmîyan, medya û warê kulturî de bêrê wedaritiş.
Peynîya eşkerayîye de venga piştîdayîşî her kesî rê ame dayîş ke seba musayîş, qiseykerdiş û averberdişê ziwanê lazkî mucadele û hetkarî bêrê pîlkerdiş.
