Verfeka DEM Partî Ayşegul Dogan îfade kerd ke ke waranê Newroze de tewr zêde waştişê azadîya Rayberê Şarê Kurdî Abdullah Ocalanî vernî de bi û vat: “Ganî şert û mercê xebata Birêz Ocalanî bivurîyê û ganî bieşko herkesî reyde têkilîye rono û dayîşûgirewtişan bikero.”
Ayşegul Dogan ke merkezê pêroyî yê partîya xo de kombîyayîşêk kerd, vat ke şerê Rojhelatê Mîyanênî dewam keno û seba pêşmergeyanê ke hêrişê vera Başûrê Kurdîstanî de ameyê kiştene, serweşîye waşt. Dogan vat: “Ganî ma heme pîya vera nê şerî vengê xo berz bikerê. Kurdan rê ferzkerdişê şerî, ma qebul nêkenê.”
‘Şar vano ganî êdî Birêz Ocalan azad bibo’
Ayşegul Dogan wina vat: “Newroze seba şarê kurdî yena manayê xoverdayîşê vera zilmî. Pîrozkerdişê Newroze seranê 90î de kiştişê seba Newroze ana vîrê ma. Bi saya xoverdayîşê ke o wext vera înkarî amebî dayene ma resayê nê rojan û bi girseyî Newroze pîroz benê.” Dogan vat ke mesajê Rayberê Şarê Kurdî Abdullah Ocalanî yê seba çareserîya demokratîke zî Newroze de gulbang da û waştişo tewr gird azadîya fîzîkî ya Birêz Ocalanî bi.
‘Destbendkerdiş û girewtiş goreyê ruhê prosesî nîyê’
Dogan vera destbendkerdiş û girewtişê seba pîrozkerdişanê Newroze reaksîyon mpojna û vat: “Tewr kêmî 28 kesî ameyê girewtene. Mûş de pankartê ke ‘Azadî û Demokrasî’ ser o nuştebi, ame girewtene. Kocaelî de polîsan tîşortê kesk, sûr û zerî girewtê. Cil û bergê neteweyî bîyê sebebê astengîyan. Nê binpaykerdişê heqan goreyê ruhê Newroze û prosesê Aştî û Komelê Demokratîkî nîyê. Dewlete Abdullah Ocalanî reyde muzakere kena la waran de posterê ci qedexe yo. Newroze referandumêk bîye. Şarê kurdî waştişê xo îfade kerdê. Êdî seba aştîyêka domdare ganî gamê qanûnî yê şênberî bêrê eştene.”
‘Ganî girewteyê nêweşî bilez bêrê veradayene’
Ayşegul Dogan qiseykerdişê xo wina domna: “Ganî bilez qanûnî bêrê vetene. Eke prosesê vetişê qanûnan derg biramo û wext vindî bibo tehlukeyê provokasyonan zî vejîyeno. Raporo hempar êdî temam o. Ganî dest bi xebatê vetişê qanûnan bêro kerdene. La çîyê ke bê vetişê qanûnan zî şênê bikerê est ê. Girewteyê nêweşî ganî bilez bêrê azadkerdene. Girewteyê nêweşî Mehmet Edîp Taşar cuya xo ra bi. Seba ney ma bihêrs ê.”
‘Heyetê DEM Partî siba şono Îmrali’
Ayşegul Dogan dîyar kerd ke heyetê DEM Partî siba şono Girawa Îmrali û Birêz Ocalan reyde kombîyayîş keno û vat: “Birêz Ocalan muzakerekerdoxo serekê yê nê prosesî yo. Ganî bieşko herkesî reyde têkilî rono. Birêz Ocalan tena serekê PKK’yî nîyo eynê wextî de Serekê mîlyonan kesan o. Ganî şertê ci yê azadî bêrê rindkerdene.”
