Şubeyê ÎHD’yî Îzmîrî bale ante rewşa girewteyo nêweş o 70 serre Kazim Avci ser û dîyar kerd ke Kazim Avci nêeşkeno hepîsaxene de bimano û vengdayîş kerd ke înfazê ey bêro taloqkerdene û lezabez bêro veradayene.
Şubeyê Komeleya Heqanê Merdiman (ÎHD) ya Îzmîrî eşkerayîya xo ya çapemenî ya ke di hewteyan ra reyke seba girewteyanê nêweşan virazena, verê Şubeyê Sumerbankî yê Kanî ê Konakî de domna. Eşkerayîye de bale ante rewşa weşî û binpaykerdişê heqan ê girewteyo nêweş Kazim Avci yo ke Hepîsxaneyê Tîpê F Hûmara 1. ê Sîncanî de yeno girewte ser o.
Çalakîye de pankartê ‘Girewteyê nêweşî mirenê, bêveng memane, mebe şîrikê sucî‘ ame akerdene. Eşkerayîye, nameyê girseyê ser o, hetê Rayberê Şubeyê ÎHD’yî Îzmîr, Nazli Turan ra ame wendene.
‘Rixmê se ra 78 agtengdarîye hema zî girewteyo’
Nazli Turan dîyar kerd ke Kazim Avci nêzdî 10 serrî yo ke bê qerarê mehkemeyêko qetî yeno girewtiş û wina vat: “Kazim Avci yo ke wayîrî raporê astengdarîyê se ra 78î yo, semedo ke lingê ey ya çepe çin a, bi hetkarîya protezêko 5 kîlo û bi gopale rayra şino. Protez û astengdarîya xo ya fîzîkî ver, wexta sewqê nêweşxaneyî beno de, taybetî wextê weniştişê wesitayanê rîngê û rayra şîyayîşî de, zehmetîyêka girde anceno. Teşhîsê nêweşîye zerrîye û bi kêmbîyayîşê mîtralî ameyê kerdene, 2ê sibata 2022î krîzê zerrîye derbas kerdo. Badê ke Nêweşxaneyê Şaristanî ê Anqara de anjîyo bi, stent damaranê ey yê girewteyan ame pakerdene. Nika şuxulnayîşê zerrîya ey kewto asta se ra 40 û eke no derece kêm bibo, ganî zerrîya ey rê pîl bêro pakerdene. Her sere, taybetî wextê hewayî serdî de, nêweşîya îltîhabê perîkardîtê ey agêrena. Sewbîna, semedê gumanê kanserî paweyê tetqîqatan o û rîskê kanserê prostatî ver zî yeno teqîbkerdene. Kazim Avci her roj, siba û şandî, pêroyî 12 hebî dermanê zerrîye, 2 hebî dermanê prostatî, 2 hebî dermanê şekerî û yew zî dermanê kêmbîyayîşê mîîtral û xeylî dermananê giranan xebitneno.“
‘Wa berpîrsîyarî wezîfeyê xo bi ca bîyarê’
Nazli Turan dîyar kerd ke girewteyo nêweş Kazim Avci her game bi tirsê derbaskerdişê krîzê zerrîye û felçbîyayîş rê cuyeno, binê zextê nêweşîyanê giran û bi psîkolojîyêka xirabe ra derbas beno û vat: “Rixmê astengdarîya xo ya giran û nêweşîyanê xo yê kronîk hema zî girewte yo, na rewşe cuya ey ser o rîskêko gird virazena. Ganî çarçewaya heqê cuye yê madeyo 17. de Destûrê Bingeyîn de ameyo garantîkerdene û heqê pawitişê estbîyayîşo madî û manewî yê kesî de û çarçewaya madeyê 2 û 3 ê Peymana Heqê Merdiman ê Ewropa de binpaykerdişêko giran ê heqan o û muameleyêko vera rûmetê merdimîye yo. Ma sere de Wezaretê Edeletî, heme sazgehanê tekîldaran ra wazenê ke wezîfeyê xo bi ca bîyarê û gamanê lezabezan bierzê.“
Eşkerayîye badê çalakîya roniştişî qedîye.
