Dayîkanê Aştîye û dayîkanê şehîdanê têkoşîna azadîye, ke Amed de merasîma yadkerdişê şehîdan de bîyî, dîyar kerd ke ê wazenê Rayberê Şarê Kurdan Abdullah Ocalanî reyde kombîyayîşêk bikerê.
Rojanê peyênan de gelek bajaranê Vakurê Kurdîstanî de seba şehîdanê Têgêrayîşê Azadîye mewlûd û merasîmê yadkerdişî ameyî kerdene. Bi sedan keyeyê şehîdan û hemwelatîyan Amed de zî merasîm de bîyî. Dayîkanê Aştîye û dayîkanê şehîdanê têkoşîna azadîye, ke yadkerdişê domanê xo de bîyî, girêdayîşê xo yê şehîdan reyde ard ziwan û vat ke seba ke êdî yew dayîke îstiran nêvarno, ganî dewlete seba Prosesê Aştîye û Komelê Demokratîkî gamanê şênber bierzo. Seba naye zî dayîkan vat ke ê wazenê Rayberê Şarê Kurdan Abdullah Ocalanî reyde kombîyayîşêk bikerê.
‘Ma wazenê bişîyê hetê Rayberîye’
Dayîka Aştîye Meryeme Tura ard ziwan ke ê sey Dayîkanê Aştîye wazenê Rayberê Şarê Kurdan reyde kombîyayîşêk bikerê û vat: “Ma serê nameyê dayîkanê aştîye wazenê bişîyê hetê Rayberîye û kombîyayîş bikerê. Seba tepîştîyan gamî nêyenê eştene, hendê tepîştîyê nêweşî est ê, ganî bêrê raverdayene. Proses heta nika zî ameyo, labelê vanê ‘Tirkîya bêteror’; no vatiş nêyeno qebûlkerdene û ganî bivajê ‘komela wayûbirayîye’.”
‘Heta aştî bibo ma do qadan de bê’
Nazîme Ozere dîyar kerd ke ê wazenê aştî bibo û vat: “Ma Rayberê xo ra bawer ê ke ma do aştî bivînê. Heta ewro çiqas zor û zehmetî ameyî ver, ma serê xo nêdayî cêr û heqîqet ra fek nêveradayî. Ma seba verarojêka birûmet na rayîr ser o yê. Heta aştî na herd ser o nêbo, payê ma qadan ra kêmî nêbenê.”
‘Aştîya birûmet her çî ra girdêr a’
Saygî Yanlişe ard ziwan ke çimê înan aştî ser o yo û berdayîşê Rayberê Şarê Kurdan Abdullah Ocalanî rê vindenê û vat: “Ma heta dilopa peyêne yê gonîya xo na têkoşîn rê danê. Ma bawer ê ke aştî do bibo. Zereyê her dayîke de adirê vîrameyîşan û êşêk est o, labelê omîdê ma yê seba aştî her çî ra girdêr o.”
‘Bila qîrayîşê dayîkanê aştîye bireso pêro hetan’
Zehra Gulpinare dîyar kerd ke ê tena seba domanê xo nê, seba veraroja nê welatî zî vengê xo berz kenê û vat: “Ma serran ra nat bi heqîqet û hezkerdiş reyde na rayîr meşna. Ma nêwazenê ke yew dayîkêka bîne mezela domanê xo ser o îstiran bivarno. Bila no qîrayîşê ma bireso pêro hetan; çareserîya aştîyane na herd ser o heqê ma yê tewr bingeyin o.”
‘Hukmat gamanê şênberan de dereng maneno’
Muşeher Ulkere ard ziwan ke hukmat êdî ganî destê xo bido ser wijdanê xo û vat: “Ma serran ra nat bi êş û kedî ciwîyayî, labelê waştişê ma yo tewr girdî aştî û wayûbirayî yo. Seba nê prosesî bila her kes destê xo bido ser wijdanê xo; bila hukmat û heme hetî gamanê şênberan bierzê. Ma aştîyêka birûmet wazenê ke domanê ma mîyanê azadîye de bibê gird.”
‘Ganî Rayber û tepîştîyê ma bêrê berdayene’
Menîce Yenî bale ante ser rewşa tepîştîyan û vat: “Heta Rayber û tepîştîyê ma azad nêbê, ma azad nêbenê. Proses hêdî şino, labelê ma Rayberê xo ra bawer ê. Vatişê Rayberê ma vatişê ma yo. Ma şehîdanê xo sebebî ra resayî na aste û ma rêça înan de yê. Ma heta peyê zî pey rêça înan de bê.”
