Endamê Akademîya Zanistanê Komelkîyan a Abdullah Ocalanî Duran Kalkanî vat ke înan 2 serran de zaf gamî eştî û naye ra pey ganî azadîya fîzîkî ya Rayber Apoyî û zemînê huqûqî û sîyasî bêro viraştene.
Endamê Akademîya Zanistanê Komelkîyan a Abdullah Ocalanî Duran Kalkanî Medya Haber TVyî rê nirxnayîşî kerdî. Kalkanî vat ke înan prosesî de zaf gamî eştî la dewlete goreyê ney hereket nêkena: “Vate est o, çalakî çin a, pratîk çin o. Derheqê statuyê Rayber Apoyî de qerarêk zî nêameyo girewtene.”
Kalkanî ard ziwan ke adirbest, Kongreyê 12., veşnayîşê çekan û antişê heme hêzanê çekdaran ê mîyanê sînoranê Tirkîya ra pey seba emnîyetê Tirkîya tu tehdîd nêmendo: “Naye ra pey seba ke ma çîyêk bikerê ganî şertê ke mi vatî bêrê ca: yew, azadîya fîzîkî ya Rayber Apoyî; di, viraştişê zemînê huqûqî û sîyasî. Ma hêvî kenê ke muxatabê ma hesabanê xeletan nêkenê. Wa nêvajê ke ma nêeşkenê çîyo bîn bikerê. Nêzdîbîyayîşê xeternakî zî est ê; ma kor nîyê.”
Kalkanî vat ke ganî vera pratîkanê zîndanan reaksîyonêko hîna xurt bêro mojnayene: “Eke zîndanan ra cenazeyêk bivejîyo ma do înan şehîdê şerî bihesibnê. Ma do vajê ke adirbest nêameyo kerdene, şer nêameyo vindarnayene, şer zîndanî de ameyo ramitene û no netîce ardo. Ganî her kes naye bizano.”
Kalkanî sewbîna vat ke Îttîfaqê Mekke qerarê kombîyayîşê NATOyî yê Ankara yo û Tirkîya bi nê rayîrî dekewena şerê vera Îranî la Zagrosan de zî Îranî reyde vera kurdan şer kena; vera nê tehdîdan çareya tekane yewîya demokratîke ya kurdan a. Kalkanî laserê Îstanbulî sey netîceyê polîtîkayanê xeletan ê îqtîdarî nirxna û vat ke hêrişê vera xoza sewîyeya sebebê serewedartişî de yê; çalakîyê wendekaranê lîseyan ê Fransa zî seba têkoşînê azadî û demokrasî hêvîyêka girde danê.
