Brûksel – Rayber Apoyî Konferansê Kurdan ê Brûkselî rê mesaj şawit. Mesajê xo de bale ante muhîmîya Prosesê Aştîye û Komelo Demokratîk ser o û vat: “Seba serkewtişê nê projeyî şima zî eşkenê zaf çîyan bikerê.”
Konferansê Kurdan emser reya 20. paytextê Belçîka Brûksel de, Parlamentoyê Ewropa de ame organîzekerdene. Rayber Abdullah Ocalanî ke 9ê teşrîna verêne de Îmrali ra mesajêk şawit, silam da beşdar û organîzatoranê konferansî. Rayber Apoyî bale ante rolê Yewîya Ewropa û xebatanê sîvîlan ser o û vat ke hewceyê gamanê neweyan est o.
‘Komplo şarê Ewropa ra nimitekî ame kerdene’
Rayber Apoyî mesajê xo de ard vîrî ke 15ê sibate 1999î de bi komployêkê mîyanneteweyî ame kerdene Îmrali û wina vat: “Bi tesîrê Gladioyê NATO’yî ez nika tîya ya. Derheqê mi de vatbî ke Ewropa de seba ey yew bost erd zî çin o. Nê komplo û kayî bi fehmê Gladioyî ameyî kerdene û şarê Ewropa ra nimitekî ameyî kerdene. Bêşik şima vera na rewşe têkoşîn kenê.”
‘Ganî Yewîya Ewropa awanker bibo’
Rayber Apoyî îfade kerd ke ganî Yewîya Ewropa ewro goreyê huqûqê xo hereket bikera û vat: “Zaf muhîm o ke Yewîya Ewropa hem seba demokratîkbîyayîşê Tirkîya hem zî seba çareserîya meseleya kurdan awanker bibo. Ewropa de rastgirîya ekstreme û meylê otorîterbîyayîşî berz benê. Rayîrê bingeyin ê têkoşînê vera nînan zî no yo ke merdim bi raştî wayîrê erjanê demokratîkan bivejîyo.”
‘Hewceyê xebatêka enternasyonale est o’
Rayber Apoyî da zanayene ke xebatê sey konferansî ke Prosesê Aştîye û Komelê Demokratîkî de yenê kerdene, piştî danê aştî û demokrasî. Rayber Apoyî vat: “Ganî xebatê şima û konferansê şima hîna domdar bibê. Hewceyê xebatêka enternasyonale est o. Xebata enternasyonal do destkewteyanê demokratîkan ê herêman û şaranê ma bîyaro têhet û eşkena bibo dekewtişê paradîgmayêka newîye ya demokrasî û sosyalîzmî.”
‘Na xebate gamêka tarîxî ya’
Rayber Apoyî bale ante xebatanê Tirkîya ser o û vat: “Ma prosesêko cidî da destpêkerdene ke herinda şeran, qirkerdişan û teberkerdişan de seba problemanê komelkîyan çareserîyanê sîyasîyan, biedaletan û huqûqîyan bivînê. Nika nîşanê persî yê girdî est ê. La ma nê nîşananê persî reyde zî modelêko zaf hîra pêşkêş kenê. Na xebate hem seba Ewropa hem zî seba Rojhelatê Mîyanênî gamêka tarîxî ya. Serkewtişê projeyê Aştîye û Komelê Demokratîkî do aştî, îstîqrar û demokratîkbîyayîşê Rojhelatê Mîyanênî mumkun bikero. Ez bawer kena ke dost û hevalê biqîymetî yê sey şima do na rewşe vila bikerê.”
