Îstanbul – YCK-KURD yê Marmara qezaya Esenyurtî de seba konferansê herêma Marmara kombîyayîşêk organîze kerd. Endamê YCK-KURD’î Rojhat Taşdemîrî dîyar kerd ke bi vengdayîşê Rayberê Şarê Kurdî Abdullah Ocalanî prosesêk dest pê kerd û şerê çekdarî qedîya û wina va: “La vera ciwanan şerê taybetî dewam keno. Ma wazenê ke ciwanan binê sîwanê YCK-KURD’î de yew bikerê. Wext wextê azadîye yo. Ganî ma bi azadîya Rayberê Şarê Kurdî biresê serkewtiş.”
Yewîya Ciwananê Komînalîstan ê Kurdan (YCK-KURD) ya herêma Marmara do 29ê teşrîna peyêne de konferansê Marmara virazo. YCK-KURD’î derheqê konferansî de binaya DEM Partî ya Esenyurt yê Îstanbulî de ciwanan reyde kombîyayîşêk kerd. Salon de pankartê “Raybertîya azade, cuya azade, komelo demokratîk” û “Wextê Serkewtişî” û fotografê Rayberê Şarê Kurdî Abdullah Ocalanî ameyî akerdiş.
Kombîyayîş seba vîrardişê şehîdanê Kurdîstanî bi yew deqîqe rêzgirewtiş dest pê kerd. Badê rêzgirewtişî sînevîzyonêk derheqê têkoşînê ciwanan de ame temaşekerdiş.
‘Ganî ma bi azadîya Rayberê Şarê Kurdî biresê serkewtiş’
Kombîyayîş de endamê YCK-KURD’î Rojhat Taşdemîrî dîyar kerd ke YCK-KURD Cizîr de ame awankerdiş û wina va: “Cizîr de, mehleya ke Mehmet Tunç tede şehîd kewtbi, ma YCK-KURD awan kerd. Şarê Kurdî tarîx de zaf rey sere wedarno. Bi pêşengîya Rayberê Şarê Kurdî serewedarnayîşo peyên bî û serran ra nat dewam keno. Zîndanê Amedî de Alî Çîçekî vatbi: ‘Partîya ma ma rê teslîmîyet nêmojna.’ Helwestê Hayrî Durmuşî zî vatbi: ‘Ma deyndarê şarê xo yê.’ Bi vengdayîşê Rayberê Şarê Kurdî Abdullah Ocalanî prosesêk dest pê kerd û şerê çekdarî qedîya. La vera ciwanan şerê taybetî dewam keno. Ma wazenê ke ciwanan binê sîwanê YCK-KURD’î de yew bikerê. Wext wextê azadîye yo. Ganî ma bi azadîya Rayberê Şarê Kurdî biresê serkewtiş. Ma seba azadîye têkoşîn kenê.”
Kombîyayîş bi persan û cewaban qedîya.













