Ankara – Parlamenterê DEM Partî Kamuran Tanhanî çalakîya seba hepsîyanê nêweşan de qisey kerd, Wezîrê Edaletî rê veng da û wina va: “Eke aştî wazenê, ganî tavilî verê heme çîyan hepsîyê nêweşî û hepsîyê sîyasî texlîye bibê.”
Keyeyê Hepsîyanê Nêweşan, Komeleya TUAY-DER, DEM Partî, Komeleya Huquqnasan a Seba Azadîye (OHD) û Komela Heqê Merdiman (ÎHD) verê Wezaretê Edaletî de bi waştişê texlîyebîyayîşê hepsîyanê nêweşan û resayîşê heqê weşîye çalakîyêka nobete ya bêmudet dabî dest pêkerdiş. Çalakî roja 6. de dewam kerd. Hemserekê MED-TUHAD-FED’î Pinar Sakik Tekîke û Kerem Canpolat, parlamenterê DEM Partî û zaf kesî tewrê çalakîye bîyî. Çalakî de bê vindertiş sloganê “Hepsîyê sîyasî şerefê ma yê”, “Seba hepsîyanê nêweşan azadî” û “Şerefê merdimîye do îşkenceyî bişikno” ameyî eştiş. Eşkerayîye de pankartêk ame akerdiş. Pankart ser o nameyê hepsîyanê nêweşan û vateyê “Ma do bi xoverdayîşî berê zîndanan akerê” nuşte bî.
‘Hepisxaneyî bîyê cayê kiştişî’
Eşkerayîye de parlamenter Kamuran Tanhanî qisey kerd û dîyar kerd ke hepisxaneyî bîyê cayê merdişê dergî û wina va: “Prosesê Aştî û Komelê Demokratîkî 2 serrî yê ke dewam keno. Ma zî tîya de vanê: Nê wextê ke ma resayê peynîya pêrodayîşan de Wezaretê Edaletî û dewlete çi pawenê? Ewro hepisxaneyî bîyê cayê kiştişî. Eke aştî wazenê, ganî tavilî verê heme çîyan hepsîyê nêweşî û hepsîyê sîyasî texlîye bibê. Mesulê cuya hepsîyan Wezîrê Edaletî yo. Dewlete xo sey dewletêka huquqî tarîf kena la ma, Kurdî, Suryanî, Ermenî, Elewî û şarê ke raştê cîyakerdişî yenê, na dewleta huquqî nêvînenê. Ma nika zî tîya de huquq wazenê û vanê ganî dewlete goreyê huquqî hereket bikero.”
Endama ESP’yî Zehra Camci zî ard ziwan ke ê do her tim piştdayîşê çalakîya hepsîyanê nêweşan de bê û va ke her çiqas rewşa hepsîyanê nêweşan giran a zî ê texlîye nêbenê.













